KALUOY sa mga kabus nga drayber, nagtinga na human sa dul-an sa tulo ka buwan nga way panginabuhi tungod sa lockdown sa enhanced community quarantine (ECQ), gitiwasan pa hinuon sa panahon nga makapasada na unta og balik ubos sa general community quarantine (GCQ).
Ngano? Daghang hasol nga rekisitos sama sa pagkuha og special permit gikan sa Land Transportation Franchising and Regulatory Board (LTFRB) bisan may prangkisa na ang sakyanan. Para unsa?
Pahamtangan pa og bug-at nga silot ug multa nga labing gamay P1,000 ngadto sa P10,000 ang mga drayber ug operator sa PUJ kon makalapas sa protocol batok sa Covid-19, sama sa physical distancing, pagsul-ob og face mask ug gwantis sa mga drayber, disinfection sa jeepneys ug uban pa.
Sa katunga lang ang pasakyon, wala nay klaro kon mokita ang mga drayber. Ang kita igo na lang o kuwang pa kaha sa gasolina o krudo ug maintenance sa sakyanan. Ang LTFRB buta sa solusyon sa naasoy nga kahimtang. Dakpon sab kaha ang magpaumento sa pletihan nga walay taripa?
Dakong binuang. Way kasingkasing nga paglatid og lagda sa GCQ. Murag matinuod ang yawyaw sa daplin nga ang balaud nakapabor lang sa datu? Ang pobre giduot og samot sa tunaan sa kalisdanan. Wala kini makita o nagpakabuta-bungol kaha ang Inter-Agency Task Force (IATF) sa Covid-19?
Kon gaan nga gipasaylo sila si Sen. Koko Pimentel ug Police Brig. General Debold Sinas, hepe sa National Capital Region Police Office (NCRPO), nga parehong nakalapas sa protocol sa Covid-19, ngano dili nato kini mabuhat sa mga drayber?
Tinuod, sama sa mga senador ug taas nga opisyal sa kapulisan, daghang badlungong drayber apan nanginahanglan sila sa igong pagsabot ug pasensiya sa awtoridad ning panahona samtang nagbantay ug giya kanila sa pagsunod sa protocol sa bag-ong normal.
Dili tiwasan sa pagpatay.