DUHA ang patay sa pagpamusil ug usa ang angol sa pagpanigbas sa managlahing dapit sa lalawigan sa Sugbo.
Carcar City
Usa ka panday ang patay human gipusil sa gikabangi nga gwardiya sa simbahan, Dominggo, Mayo 24, sa 1:10 sa kaadlawon sulod sa compound sa Saint Catherine Church sa Barangay Poblacion 1, dakbayan sa Carcar.
Ang biktima mao si Felomino Acuña, hingkod na, ulitawo ug taga Sitio Dam, Poblacion 1, panday sa simbahan.
Samtang nadakpan ang suspek nga si Cirilo Enad Mancia, 56, minyo taga Sitio Patio, Barangay Buenavista, Carcar, security guard sa naasoy nga simbahan.
Si Police Staff Sgt. Raymond Amance, imbestigador sa Carcar Police Station nga nahinabi sa Superbalita Cebu, nagkanayon nga karaang panagbangi sa duha ang motibo sa krimen.
Ang biktima naila nga palahubog ug nakainom sa wa pa mahitabo ang krimen.
Ang gwardiya duty sa simbahan dihang iyang gipusil ang biktima didto sa likod sa kumbento, kinsa naigo sa walang bahin sa ilok hinungdan nga dead-on-arrival (DOA) sa ospital.
Naabtan pa sa mga pulis ang suspek ug nakuha ang .38 rebolber nga dunay upat ka buhing bala, ug usa ka kabhang.
Nasayran sab nila nga sa miaging adlaw nagkalalis sab ang duha kay giingong hubog kini.
Minglanilla
Pusher patay human gibunlot sa tulo ka wa mailhing tawo samtang natulog, giguroy pagawas sa ilang panimalay ug gibuk-an sa ulo niadtong Sabado, Mayo 23, sa alas 10:45 sa gabii sa Purok Lumboy, Sitio Napo, Barangay Guindarohan, lungsod sa Minglanilla.
Si Philip Warren Abatayo, 31, minyo ug ex-convict patay human nakaangkog samad pinusilan sa agtang.
Si Police Staff Sgt. Ernest Laspuña, sa Minglanilla Police Station nga nahinabi sa Superbalita Cebu, nibutyag nga natulog na ang biktima niadtong higayuna dihang naabot ang tulo ka mga wala mailhing tawo nga naka-bonnet, gibunlot ug giguroy pagawas agi sa kusina, dayon usa sa mga suspetsado mipusil sa iyang agtang.
Paspas nga nibiya ang mga mamumuno sakay sa wa matinong motorsiklo. Matod ni Laspuña, nga drugas ang motibo sa krimen ang ilang gisubay.
Nasuta nga ang biktima nadakpan niadtong Septiyembre 30, 2018 tungod sa kaso sa ilegal nga drugas. Nakagawas pagka-Marso 2020 human sa plea bargaining.
Alegria
Natabas ang nawong sa usa ka mag-uuma human gitigbas sa iyang higalang construction worker kinsa nasuko nga ihatud gumikan sa kahubog sa miaging hapon sa Sitio Tagaytay, Barangay Guadalupe, lungsod sa Alegria.
Si Filiciano Gornez, 53, ug mag-uuma ang nahuwasan sa iyang kahubog human matabas ang iyang nawong dihang gihapsan sa sundang sa iyang higala nga si Gilbert Alimorin, 49, ug dunay kapuyo.
Matod ni Police Master Sgt. Joselito Ferellamo sa Alegria Police Station, ang managhigala naglingawlingaw og tagay.
Apan dihang nasaktuhan na sa karga sa ilimnong makahubog, nagkalalis ang duha.
Ang biktima nitanyag nalang sa iyang higala nga ihatud niya sa ilang panimalay kay nakita niya nga hubog na kini, naglisod na sa yawit, ug nagbaragbarag na.
Apan, wa makauyon ang suspek sa gisulti sa biktima sa kalagot kalit nga milanit sa sundang diha sa iyang hawak gitaking ug gitigbas niini.
Swerte ang biktima kay nakalingkawas sa tinong kamatayon. Nadakpan ang mamumuno.
"Natandog iyang garbo Sir kay di daw siya hubog nganong ihatud man nga makatultol pa siya sa ilang panimalay," sumala ni PMS Ferellamo.
Hinuon ang suspek malinawon nga mitahan sa kapulisan nga mirespondi. (GPL)