ANG kwalipikadong mga panimalay sa Central Visayas nga beneficiaries sa social amelioration program (SAP) nga wa makadawat sa ilang cash assistance sulod sa deadline nga gitakda sa pag-apud-apod, makadawat sa ilaha dungan sa “left outs.”
Matod sa Department of Interior and Local Government (DILG), ang left outs mao ang mga panimalay nga wa pa malista sa unang tranche, apan kwalipikadong makadawat sa cash nga hinabang.
Si Shalaine Lucero, assistant regional director sa Department of Social Welfare and Development (DSWD) 7, niingon nga makadaghan na sila mohatag og mga lugway sa pag-apud-apod, di na sila molugway pa gawas kon mandoan sa central office.
"Kani tanang unpaid sa Cebu City ug sa Mandaue City (first tranche) kay deadline naman today, pinaka-last, isulod nato sa left out para mabayran gihapon sila," matod ni Lucero sa Dominggo, Mayo 24.
Base sa ilang record sa mga alas 12 sa udto sa Dominggo, mga 18,248 ka mga beneficiary sa SAP ang wa pa mabayri. Sa mao nga gidaghanon, 5,359 gikan sa Mandaue City samtang ang 12,889 sa Cebu City.
Tungod kay molanat man hangtod sa Dominggo, Mayo 31, ang pag-apud-apod sa hinabang, matod ni Lucero nga naglaum sila nga ang di mahatagan nga beneficiaries mominos.
Ang Dakbayan sa Mandaue nihunong na sa ilang pay out sa Sabado. Naghuwat na lang sila sa final report sa Siyudad. Sa mga alas 12 sa udto sa Dominggo, ilang coverage niabot na og 90.39 percent.
Sa Dominggo, siya niingon nga sa kinatibuk-an moabot na og 170,000 ka panimalay nga beneficiaries ang giila sa rehiyon, base sa mga listahan nga giduso sa mga LGU.
Siya niingon nga ang mao nga mga listahan susihon pa sa DSWD 7.
Matod ni Lucero, wa pa sila makadawat sa gipirmahang guideline alang sa pag-apud-apod sa hinabang alang sa left outs gikan sa central office.
Sa tibuok rehiyon, mokabat na sa 1,020,235 ka mga panimalay nga beneficiaries ang nakadawat sa P6,000 nga SAP. Kini balor og P6,121,950,000 kun 96 porsyento sa kinatibuk-ang P6.3 billion sa SAP fund nga gigahin sa rehiyon ang nahatag.
Matod ni Lucero, ang 18 ka LGUs nga nakakompleto na sa ilang payout nakaigo sa ilang target allocation kay mas minos ang gidaghanon sa actual nga kwalipikadong beneficiaries sa ilang dapit.
Niini, sila nagpaabot nga mahiuli kanila ang P116.9 million nga wa magamit nga pundo.
Sa 132 ka LGUs sa rehiyon, 130 ang nakahuman na sa ilang distribution. Sa 130, 77 ang nakahuman na sa ilang liquidation, dugang ni Lucero. (WBS)