BANSALAN, Davao del Sur -- Gitakdang kasohan sa kapolisan ang duha ka mga ulitawo human nasikop nga lango sa ilimnong makahubog ug aroganteng mitubag-tubag kanila atol sa beripikasyon.
Nahitabo ang insidente didto sa Purok Garcia, Barangay Mabunga, alas 7:50 sa gabii, Biyernes, Mayo 22.
Ang mga suspek giila nga sila si Berne Simuran Cabase, 49, molupyo sa lugar ug Elmer Ague Tundag, 46, residente sa Purok Pag-asa, Barangay Poblacion sa lugar.
Sa taho gikan sa Bansalan Municipal Police Station, nasayran nga miresponde ang mga sakop sa 1104th Regional Mobile Force Battalion (RMFB) human nakadungog sila og malanog nga boto gikan sa ilang kampo sa silingang Barangay Mabuhay.
Gibutyag ni Major Peter Glenn Ipong, hepe sa kapolisan, nga sa paghidangat sa RMFB sa balay sa usa ka Arnold Tinampay, nasayran nga usa ka firecracker ang milanog nga boto sanglit aduna’y nagsaulog og birthday sa maong dapit.
Apan, si Corporal Nicol John Lucero, nga maoy mihimo sa imbestigasyon, gihulagway nga gitubag-tubag ni Cabase kinsa lango sa ilimnong makahubog ug arogante ang pamatasan niadtong higayona.
Susama sab nga batasan ang giingong gipakita ni Tundag mao nga gipangsakay kini sa mga otoridad sa ilang patrol car ug gidala sa istasyon sa pulis.
Human napadlak sa selda sa kapolisan, giandam dayon sa Bansalan MPS ang kasong paglapas sa Article 151 sa Revised Penal Code ug Republic Act (R.A.) 11332 o Bayanihan to Heal as One Act. Orlando B. Dinoy