Gipatay sa Tagum may kalabutan sa palpak nga money investment?

TAGUM CITY, Davao del Norte -- Usa ka makuti nga imbestigasyon ang gihimo karon sa kapulisan sa Tagum City Police Station sa pagpusil-patay sa usa ka babaye alas 9:20 sa buntag niadtong Sabado, Mayo 23, didto sa Old City Hall, Rizal Street, Magugpo Poblacion.

Ang biktima giila nga mao si Jinalyn Garcia, 40-anyos, molupyo sa Visayan Village ning siyudad ug lumad nga taga Claver, Surigao del Norte.

Sumala ni Lieutenant Colonel Pablito Odias, hepe sa Tagum City Police Station nga niadtong higayona ang biktima mikanaog sa gisakyang kolor pula nga kotse ug samtang naglakaw, gipusil sa wa mailhing armado nga maayong pagkaigo sa tangkugo nga miresulta sa hinanaling kamatayon niini.

Nagtuo ang opisyal nga gisundan kini sa mamumuno, ayha pusila dihang nakahigayon sa pagnaug ang biktima sa sakyanan.

Sa social media, nagbaha dayon ang mga komento sa netizens nga ang pagpatay sa biktima alegasyong dunay kalabutan sa palpak nga investment scheme nga mitakdo usa ka tuig ning bulana sa pagkusog sa investment sa Tagum City.

Apan gibutyag sa hepe sa kapulisan sa Tagum nga wala pa'y kongkreto nga impormasyon kung unsay motibo sa pagpatay sanglit nagpadayon ang ilang gihimong makuti nga imbestigasyon.

Giingon sa opisyal nga kini ang unang higayon sa pagpamusil sa siyudad sukad napatuman ang community quarantine niadtong Marso 15, 2020.

Ang patay nga lawas sa biktima gihaya na sa iyang pamilya. Dexter T. Visitacion

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph