MACO, Davao de Oro -- Duha ka mga patay’ng lawas ang napalgan sa bukirong bahin sa Barangay Mainit Lungsod sa Maco kini luyo sa gipatumang general community quarantine (GCQ).
Subay sa report sa kapulisan ang pangalan sa mga biktima mao sila Eddie Andayo, 44-anyos, ulitawo; ug usa ka Boyet Poler Dagsangan pulos molupyo sa Purok Pagbabahayan, Barangay Mainit ug pulos mga mag-uuma.
Subay sa pamahayag sa usa ka Ramil Dagsangan, alas dos sa hapon dihang iyang nakit-an ang patay’ng lawas sa kabanay nga si Boyet Poler Dagsangan.
Nasayran nga gilayong nangayo og tabang si Ramil sa mga balay nga duol sa dapit apan, sa dihang siya miadto sa balay ni Eddie Andayo, namatikdan niya ang lain nga baho gikan sa sulod sa balay.
Sa dihang gisusi niya kini, maoy nakit-an ang dugo nga nauga ug nadiskubrehan sa sulod ang patay’ng lawas ni Andayo nga nagsugod na sa pagkadugta kinsa nakahiagom og mga samad tinigbasan.
Sama kang Andoyo, si Dagsangan, nakaangkon sab og mga samad tinigbasan sa kalawasan nga maoy hinungdan sa kamatayon niini.
Dugang nasayran nga nakahukom ang pamilya sa mga biktima nga ipalubong dayon kini.
Sa gihimong pakighinabi sa SunStar Superbalita kang Police Sergeant Mark Francis Ferrer, sa Maco Municipal Police Station gibutyag sa imbestigador nga di pa nila masuta kung unsa ang motibo sa pagpatay sa duha ka biktima.
Sumala sa kapulisan nga lisod adtuon ang dapit nga maoy usa sa mga hilit nga lugar sa Maco, apan bisan paman nahimo sa kapulisan ang pag-imbestiga sa crime scene.
Ning kasamtangan, usa ka lawom ug makuti nga imbestigasyon ang gilusad sa Maco MPS sa maong hitabo samtang ang pamilya sa duha ka biktima duna nay motibo sa pagpatay nga mao karon ang ilang gisangon sa kapulisan.