KAMINGAW ngadto sa ilang pamilya ang usa ka hagit sa mga kawani sa Mandaue City Disaster Risk Reduction and Management Office (DRRMO) nga frontliners sa Covid-19 crisis human sila wala na makauli sa ilang panimalay sulod sa duha ka buwan.
Sukad nagsugod ang enhanced community quarantine (ECQ), ang mga kawani sa DRRMO nipili nga dili mopauli sa balay aron mapugngan ang pagpakatap sa Covid-19 sa ilang pamilya samtang sila misanong sa mga kaso nga may kalabutan sa Covid-19.
Adunay 93 ka mga personahe sa DRRMO ug 32 ka mga personahe sa Command Center nga nag-duty sulod sa 24 ka oras.
Si Felix Suico Jr., hepe sa operasyon sa DRRMO, nagsulti nga usa kini nga unanimous decision sa tanan nilang mga kawani nga magpabilin sa ilang estasyon.
Gihimo nila ang parking building sa Mandaue City nga ilang temporaryong kapahulayan.
Ang ground floor diin mag-estar ang mga person-on-duty, samtang ang mga off duty nga mga kawani magpahulay sa ikatulo nga andana sa building.
Gihatagan sila sa siyudad og mga folding bed aron ilang kahigdaan apan adunay uban nga magdala sa ilang kaugalingong tent.
Gitugotan ni Suico ang mga kawani nga magpauli bisan kausa sa usa ka semana aron pagkuha og mga sinina.
Sa iyang bahin, si Suico mouli sa ilang balay sa ala 1:00 sa kaadlawon aron magkuha og mga sinina nga gibilin sa iyang asawa sa gawas sa balay ug ibilin usab niya ang iyang mga bulingon sa gawas og giputos sa plastic aron ihumol.
Niining mga orasa, natulog na ang iyang pamilya ug wala gyud silay higayon nga magkakita.
Bisan lisod kini alang ni Suico nga mingawon sa iyang pamilya apan hunahunaon na lang niya ang kaluwasan sa iyang pamilya.
Mag-video call hinuon si Suico sa iyang pamilya apan dili kini igo tungod dili siya makagakos nila.
Si Romeo Tibon II, 50, usa ka emergency medical responder sa DRRMO, niasoy sa Superbalita Cebu nga sa iyang 28 ka tuig nga responder, sa Covid-19 siya nahadlok tungod wala lang siya nabalaka sa iyang kaugalingon apan sa iya sab nga pamilya.
Bisan sa iyang kahadlok sa Covid-19 apan proud gihapon siya sa iyang trabaho isip usa ka responder ug frontliner karong panahon sa krisis.
Bisan kon kanunay sila magsul-ob sa personal protective equipment (PPE) sa matag responde nila mahimo’g usa kini nga may kalabutan sa Covid o dili, gisiguro nila nga kanunay maghunahuna siya nga luwas nga makapauli sa iyang pamilya human sa krisis.
Ang pagtumar og vitamins, igo nga pagtulog, ug pagkaon nga husto mao ang iyang mga pamaagi sa pagpanalipod sa iyang kaugalingon gikan sa Covid-19.
Si Mario Perez, deputy chief of operation sa DRRMO, nagsulti sa Superbalita Cebu nga silang tanan kanunay naghunahuna sa ilang pamilya sa kanunay nga pag-atubang sa Covid-19.
Hinungdan nga aduna gyuy ekstrikto nga measures ang gibuhat ang ilang mga kawani.
Dili tanan sa ilang mga kawani ang nakapahimutang sa parking building tungod kay ang pipila sa kanila gi-isolate tungod sa ilang kontak sa usa ka pasyente nga Covid-19 bisan asymptomatic o adunay mga sintomas.
Ang ilang isolation center naa sa ilang substation sa Barangay Subangdaku, diin sila i-isolate sa 14 ka-adlaw.
Gipaambit ni Suico nga ang tanan nga mga kawani nakaagi sa rapid antibody test ug siya mapasalamaton nga ang tanan nilang kawani negatibo ang resulta.