DUHA ang patay sa managlahing shooting incident nga natala niaging semana sa probinsya sa Bukidnon.
Unang insidente nahitabo Mayo 18, 2020 sa Purok 6 Mandahican, Cabanglasan, Bukidnon.
Giila ang biktina nga mao si Milbert B. Sarucam, 38, minyo, mag-uuma ug residente sa Purok-8, Poblacion, Cabanglasan, Bukidnon.
Sa imbestigasyon sa Cabanglasan Police Station, nasuta nga kining biktima anaa sa iyang payag adtong tungora dihang upat ka mga lalaki namusil niini, hinungdan di tiaw ang samad pinusilan naangkon sa lawas maoy rason sa iyang kamatayon.
Nakigkoordinar na ang kapusilan sa kasundalohan aron maimbestigaran kini nga insidente.
Ikaduhang pagpamusil natigayon gihapon Mayo 18, 2020 mga alas 3:00 sa kadlawon sa Barangay Siloo, Malitbog, Bukidnon.
Biktima usa ka 15 anyos nga si Junrel C. Indanon kinsa atol sa insidente kauban ang iyang amahan nga si Carlito nga natulog sulld sa ilang payag sa umahan.
Lima ka buto ang nadungog sa amahan ug maoy nakita iyang anak naligo sa dugo ug samaran ang likod niini nga maoy gitouhang hinungdan sa iyang hinanaling kamatayon. Nahipos sa crime scene ang basyo sa kalibre 45.
Ang suspek padayon pa nga gipangita sa kapulisan sa Malitbog Police Station.