SUPERBALITA CEBU

Llenes, 'killer' ni Silawan, naghikog

MIKOMPISAL. Mao kini si Renato Llenes, suspek sa pagpatay ni Christine Silawan, miangkon sa krimen. Sa Dominggo sa buntag, Mayo 24, siya napalgang nagbitay sa infirmary sa Lapu-Lapu City Jail. (SunStar File)

PATAY na ang suspetsadong miangkon nga maoy nipatay sa 17 anyos nga si Christine Silawan human makaplaging nagbitay sud sa clinic sa Lapu-Lapu City Jail sa sityo Soong, Barangay Mactan, Lapu-Lapu City niadtong Dominggo sa buntag, Mayo 24, 2020.

Matod sa usa ka kasaligang tinubdan nga “consistent with asphyxia by ligature” kun pagkatuok ang hinungdan sa kamatayon ni Renato Llenes base sa autopsy nga gihimo ni medico legal officer Dr. Benjamin Lara.

Giingon nga way foul play nga nakita sa autopsy. Nasayran usab nga si Llenes nagsige na og hulga nga maghikog.

Nagduda

Samtang si Jail Superintendent Jessie Calumpang, Lapu-Lapu City Jail warden, nagduda nga adunay foul play sa kamatayon ni Llenes kay base sa inisyal nilang nasayran nga diha sa samang infirmary aduna nay upat ka priso ang naghikog.

Sagad sa paagi sa mga naghikog mao ang paghigot sa ilang liog ug naandan nga mogawas o modiwal-wal ang dila ug maglaway o magsuka.

Apan sa kang Llenes, wa kini mahitabo hinungdan nga siya nagduda nga gipatay sa kaubang piniriso.

Apan si Fredizwinda Vercede, manager sa Sure Life Funeral Homes diin gidala ang lawas ni Llenes, nipasabot nga sa kadaghang kaso sa hikog nga dad-on diha sa ilang punerarya, dili tanan nga modiwal ang dila.

“Dili tingali tanan, kay kanang modiwal ang dila kana sigurong moutong ug monga-nga,” saysay ni Vercede.

Gibutang sa infirmary cell si Llenes, wa giipon sa male dormitory human nakadawat kini og panghulga nga patyon sa uyoan ni Silawan nga nabilanggo sab sa maong facility.

Pasado alas 5:00 sa kadlawon niadtong Dominggo, napalgang nagbitay si Llenes sa iyang mga kauban sa infirmary.

Gamit ang t-shirt nga gigunting-gunting ug gisapid ug maoy nagsilbing higot nga gibaat sa iyang liog, sa may latrine area (pansayan) sa infirmary.

“Adunay inmate nangutana niya (Llenes) kon unsaon niya (Llenes) ang t-shirt nga gisinapid. Himuon kunong hayhayan,” asoy ni Calumpang.

Nagkanayon si Calumpang nga nagpadayon ang ilang imbestigasyon sa ubang inmate kon aduna ba silay nabantayan sa panglihok-lihok ni Llenes, ug kon nag-antos ba og depression.

Amot-amot

Dugang pa sa opisyal nga mga opisyal sa jail facility nag-amot amot aron makahipos og P5,000 isip downpayment sa punerarya aron ma-atiman ang minatay ug ma-autopsy gilayon.

“Nagtulod-tulod man tong ang iyang misis, ginikanan ug paryente kon kinsa moatiman. Ang iyang pamilya wa na dire (Lapu-Lapu) mibalhin nag puyo sa Cebu,” sumala pa Calumpang.

Si Llenes niangkon nga maoy nipatay kang Silawan kinsa napalgang nagbuy-od ug naputos ang lawas sa dinunggaban.

Ang nawong ni Silawan nakalabera human gilaplap ang panit sa iyang dagway.

Ang iyang lawas nakit-an nalang sa hawan ug hilit nga bahin sa Barangay Bankal niadtong Marso 11, 2019.

Ubos sa impluwensiya sa ginadiling drugas si Llenes atol sa krimen base sa iyang pangankon human siya balibare ni Silawan nga makighilawas ug gitamparos siya hinungdan nga nawala siya sa kaugalingon. (FVQ)


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph