Pipila ka ginikanan di una pa-eskuylahon ilang mga anak

DAVAO DE ORO -- Nabalaka ang pipila ka mga ginikanan ning probinsya ug nagduha-duha nga kung pa-tunghaon ba sa eskuylahan ang ilang mga anak, sanglit wa pay bakuna sa gikalisangang coronavirus disease (Covid-19).

Ang inahan nga si Arsenia nga dunay duha ka anak sa elementarya nagduha-duha nga pa-eskuylahon ang iyang mga anak sa kahadlok nga basin og mataptan sa kagaw.

Matud pa nga delikado sa sakit ang mga bata sanglit hina pa sila og immune system. Gikahadlokan sa maong inahan nga basin og dunay usa ka bata nga magkasakit sa classroom ug magtakod-takod ug malakip ang iyang mga anak nga mataptan sa virus.

Ang amahan usab nga si Efren nga usa ka empleyado sa gobyerno hugot ang desisyon nga di usa pa-eskuylahon karong tuiga ang iyang tulo ka mga anak sa higayon nga magsugod ang klase og wa pa'y tambal o bakuna sa Covid-19.

Sumala sa amahan nga di niya isugal ang kinabuhi sa iyang mga anak, sanglit ang edukasyon makahulat man kuno apan, ang virus way gipili nga petsa o higayon nga mutapot sa lawas sa tawo.

Sama kang Efren, ang inahan sab nga si Candelaria nga dunay bugtong anak nga nagtungha sa hayskol di una sab pa-eskuylahon ang anak, ina'y patabangon lang una sa ilang umahan sa bukid aron maseguro ang kaluwasan ug mahilayo sa peligro ang kinabuhi.

Alang kang Candelaria, usa ka sugal ang pagpa-eskuyla sa anak ning panahon sa pandemya ug di niya isugal ang bugtong binuhat nga nag-inusarang kabilin sa lalaking gimahal nga mipanaw na sa laing kalibutan. (Dexter T. Visitacion)