Pagpanghatag og ayuda sa Davao del Sur, na-isyu?

DAVAO DEL SUR -- Buot karon sa pipila ka mga bokal sa lalawigan nga makita ang listahan sa mga benepisyaryo sa tanang nakadawat og ayuda gikan sa ilang gi-aprobahang badyet nga kapin P200 milyones apil na ang Bayanihan grant.

Nasayran nga mihimo og privilege speech si Bokal Lanie Gabutero atol sa ilang sesyon sa miaging semana human nga buot nilang masayod kun unsa na ang status sa ilang pagpang-apud-apod og hinabang sa katawhan.

Matod ni Gabutero nga nakaabot sa ilang kasayuran nga tag 200 ka food packs lamang ang nadawat sa matag barangay apan buot nilang masayod kinsa ang mga nahatagan sa ayuda.

Giangkon ni Gabutero nga aduna sila'y nadawat nga impormasyon nga pipila sa mga nakadawat gilista sa mga unit leader (UL) sa Cagas Cares sa mga barangay.

"Anyway, wala man mi kabalo ana so ang gusto unta namo makadawat gyud tanang katawhan ug pila ang nahatagan kay mga 49,000 ka tawo lang ang nakadawat, due to constraints sa budget," asoy sa bokal.

Dugang niya, "sa akong privilege speech, akong giingon nga we have to verify para makita nato ang listahan kinsa gyud ang mga nakadawat. Nigawas man gud nga naa'y mga barangay nga niingon nga wala niagi sa ilaha, (ang ayuda)."

"Ang isyo man gud dili ang 200 packs nga nahatagan, naa man gu'y nigawas nga info, nga ang mga nag-identify sa hatagan ang mga UL (unit leader) daw sa Cagas Cares, pero wa man ko kabalo kung tinuod o dili kay wa gani ko kabalo unsa ng UL, mao nga mangutana ta sa proper implementing agency, so the only way to verify, mangayo mi sa listahan, then ipa-confirm nato sa barangay kung tinuod nga sila gyud," pagklaro ni Gabutero.

Matod ni Gabutero nga kinahanglan nilang tukion ang maong isyo aron masulbad ang reklamo sa ubang mga wa makadawat og ayuda.

"Hopefully, because nag-privilege speech ko unya na-submit na nato na mga duha na ka semana, makahatag na sila by May 27, naa ta'y kopya sa name sa recipient, siguro makahatag sila kay dali ra ba na ma-identify kung kinsa'y nahatagan," ni Gabutero.

Unang nahitabo ang kagulyang sa mga board members atol sa ilang session sa miaging mga sesyon, duha ka semana na ang milabay human mi-resign ang ubang bokal sa komitiba nga ilang gihuptan.

Sumala ni Gabutero nga silang mga minority nga sakop sa Sangguniang Panlalawigan wala makahupot og komitiba apan ilang gigamit ang mga committee nga ilang gihuptan niadtong tuig 2016 mao nga naplastar na ang mga komitiba.

Gidason niini nga aduna na'y giandam nga 11-13 isolation room sa Davao del Sur Provincial Hospital isip pagpangandam sa coronavirus disease ug ipaayo sab ang mga lawak nga naapektohan sa miaging linog. (Orlando B. Dinoy)