USA ka lalake ang sekretong misulod sa barangay isolation center (BIC) sa San Nicolas Elementary School sa Barangay Duljo Fatima, siyudad sa Sugbo, Dominggo sa gabii, Mayo 24.
Nimugna kini og kaguliyang sa sud sa BIC human gidili sa pagsulod ang ubang tawo sa naasoy nga pasilidad.
Si Duljo Barangay Captain Elmer Abella niingon nga human nasayod sa kagubot sulod sa maong tunghaan dali niini nga gisusi.
Dugang ni Abella, iya dayong gipahibalo ang barangay kapitan sa Barangay Suba nunot na sa maong insidente.
Usa ka 20 anyos nga lalake ang sekretong nakasulod sa BIC tungod sa giingong kamingaw sa kapuyo nga nasulod sa pasildad.
Si Rommel (nihangyo sa pagpatago sa matuod nga ngan) nahinabi sa Superbalita Cebu niangkon nga nisulod sa pasilidad agi sa koral sa kilid sa tunghaan hinungdan nga wa mabantayi sa kapulisan.
Giangkon ni Rommel nga gimingaw siya sa iyang kapuyoa nga positibo sa Covid-19 ug gidala sa pasilidad human sa pipila ka adlaw gikan nanganak.
Ang iyang kapuyo nag-edad usab og 20 anyos ug ang duha pulos lumolupyo sa Barangay Suba.
Gaws sa kalingaw, giangkon ni Rommel nga gibati siya og pangabubho human wa masayod sa kahimtang niini sa sulod sa BIC.
"Gimingaw lage ko, sir, mao na nga mianhi gyud ko. Mangayo pud ko og pasaylo, sir, sa nabuhat nako," pamahayag ni Rommel.
Wa matino sa Superbalita Cebu kon silotan si Rommel sa iyang nabuhat apan gipapauli human dunay masuso nga giatiman. (BBT)