GIPATIGBABAWAN ni Michael Joseph Pagaran ang kapin sa 100 ka chess players nga mipuga sa ilang tagsatagsa ka utok sa labing unang online blitz tournament sa Cebu Executives Professionals Chess Association (Cepca) niadtong Mayo 23, 2020.
Ang 29 anyos nga si Pagaran nakatigom og 54 puntos aron dag-on ang titulo sa President's Cup, nga gipahinungod sa adlawng natawhan ni Cepca president Jerry Maratas.
Si Pagaran, kinsa Electronics and Communication Engineering graduate sa Bohol Institute of Technology - International College, ka usa ra napilde sa iyang gisagubang nga 18 ka mga duwa.
Sa lagda, ang daog nagbalor og duha ka mga puntos ug usa ka puntos alang sa panagtabla.
Kon ang magduduwa makasagunson og duha ka mga daog, ang sunod nga daog magbalor na og upat ka mga puntos.
Si Pagaran, kinsa kanhi gold medalist sa Palarong Pambansa ug Private Schools Athletic Association (Prisaa), nakasagunson og 12 ka mga daog human siya naangkon ang bugtong niyang pilde ikaunom nga duwa.
Nagsunod kang Pagaran, kinsa kasamtangang chess coach sa Cebu City Sports Commission, mao sila si Bryle Arellano (38), Antonio Cabibil (34), Jave Mareck Peteros (34) ug Rosendo Yamyamin (34).
Mokompleto sa top 10 mao sila si Ariel Joseph Abellana (33), Eden Diano (32), Rolzon Roullo (32), NM Rommel Ganzon (30) ug Ruel Nuttal (30).
Sa laing bahin, sila si Cabibil, Yamyamin ug Nuttall mao ang ningpuwesto sa Top 3 sa Cepca A rankings samtang sila si Percival Fiel, Randy Cabuncal ug Richard Ouano sa Cepca B.
Si Sheila Khan Sepanton maoy top female player ug si Dave Lavandero maoy top Under-16 player. (ESL)