GARBO nakong ipailaila ninyo ang mga Cebuano talent sa nag-viral nga music video nga nanganta og “We Are The World” nga ilang gipahinungod sa mga frontliner.
Pamilyar gyud mo aning kantaha kay puros superstar sa recording ang nanganta ani niadtong 1985 nga gi-composed nilang anhing Michael Jackson ug Lionel Richie alang sa USA for Africa.
Ang karon nga cover version giulohan og “We Are The World: Voices United To Fight Covid-19” nga gipangulohan sa singing priest nga si Fr. Jonas Mejares.
Ila ning gi-record sa ilang tagsa-tagsa ra ka mga panimalay ug dayon ilang gi-send sa editor sa maong video. Nindot kaayo pagka-sync sa ilang tingog. Bilib ko!
“Mga usa ni ka semana namong gihimo ug nahuman niadto lang Huwebes,” matod ni John Well Tugot nga usa sa mga performer sa maong video. Si John mao say nakadiskubre niadto sa YouTube sensation Roland “Bunot” Abante.
Apan sagad nila niangkon nga wala gyud silay nadawat nga ayuda gikan sa SAP o social amelioration program. Luyo sa kalisdanan ilang gipakita nga solid gihapon silang mga musikero sa Sugbo ug nagpakabana sa mga frontliner ug sa mga biktima ning maong katalagman.
Gani, niadtong Dominggo na-featured dayon ang ilang music video sa CNN Philippines.
Ang mga nanganta sa “We Are The World: Voices United To Fight Covid-19” mao ang mosunod:
Edgar Butalid; Mark Louie Cabanero; Roy Seguerra Bargamento; Nathan Que; Ricky Tibay; Dems Shock Echavez; Rommel Tuico; John Well Tugot; Junalou Rosales Torrevillas; Julyann Uy; Jovelyn Furog; Dan Valentin Escasinas; Fr. Jonas Mejares; Jessa May Abaquita; Gerlyn Abano; Herme Buquiran; John Clayton Abellana; Ron Llanes; Louie Allones; Sario Bueno; Vanjo Pace; Shane Gerald Alvarado; Edilberto Lopez Jr.; ug Romeo Alburo (video editor).