UNOM ang natala nga namatay sa siyudad sa Cagayan de Oro sa adlawng Sabado ug Dominggo, Mayo 23 ug 24.
Kini ang gibutyag ni Dr. Joselito Retuya, ang epidemiologist sa City Health Office, nga adunay upat ka mga indibidwal nga namatay sa panimalay ug aduna sab dili coronavirus disease (Covid-19) related ang gikamatyan.
Samtang adunay usa nga gisuspetsahan ug gi-contact trace na ang mga close contact niini.
Ang unom ka mga narekord nga nakabsan sa kinabuhi mao ang mosunod.
Una mao ang 26 anyos nga babaye nga taga FS Catanico, ning siyudad sa Cagayan de Oro, namatay niadtong Mayo 24 sa alas 4:30 sa kaadlawon. Ang final diagnosis niini mao kining hypovolemic acute blood loss secondary to tuberculosis. Kini nga pasyente walay travel history ug walay exposure sa Covid patient. Ang patayng lawas niini ang gi-cremate.
Ikaduha mao ang 89 anyos nga babaye gikan sa Bulua sa siyudad sa Cagayan de Oro. Namatay sulod sa puloy-anan. Ang final diagnosis niini mao kining acute myocardial infarction, congested heart failure. Namatay niadtong alas 2:10 sa hapon sa Mayo 23. Gi-tag isip non-Covid ug gihaya sa panimalay ug gitakdang ilubong sa Mayo 27.
Ikatulo nga namatay sulod sa panimalay usa ka indibidwal nga taga Upper Bulua. Ang diagnosis niini mao kining acute myocardial infarction, electrolyte imbalance, malnutrition ug bedridden, adunay transport permit niadtong Mayo 23 paingon sa Lanao del Sur.
Ika-upat nga namatay sulod sa puloy-anan kining 83 anyos nga lalaki, taga Zone 10, Zayas, Carmen kinsa Mayo 19 nagpakonsulta sa JR Borja Hospital. Sa assessment, gipapauli Mayo 21, nagpakonsulta og usab ug gipapauli. Pagka Mayo 23, gidala balik sa JR Borja Hospital tungod nawad-an og panimout. Dead on arrival kini sa hospital. Usa kini ka sudden cardiac death ug non-Covid. Ang lubong niini gitakda sa May 27, 2020.
Ika lima kining 30 anyos gikan sa Barangay Lapasan ug adunay diagnosis nga septic shock secondary to community acquired pneumonia. Mayo 22, naadmit sa pribadong balay tambalanan ug didto nakuhaan sa swab test tungod kay walay testing niadtong Dominggo sa Northern Mindanao Medical Center. Laumang karon adlawa mogawas na ang resulta sa swab test niini.
Matud ni Retuya nga gilusad na sa Barangay Health Worker ang contact tracing.
Ang ika unom mao kining usa ka indibidwal gikan sa Barangay Bugo nga gi-admit Mayo 24 sa pribadong hospital ug nakabsan sa kinabuhi kadlawon sa Mayo 25. Ang diagnosis niini mao kining community acquired pneumonia, high risk with hypoxemia hypertensive cerebral vascular disease. Gitakdang dalahon ang patayng lawas sa Gingoog City.