NAMATAY sa wa pa matino nga balatian si manlalaban Marie Velle "Amay" Abella, 37, kinsa nagpapili sa pagkakonsehal sa south district sa Dakbayan sa Sugbo ilawom sa Bando Osmena Pundok Kauswagan (BOPK) niadtong 2019 elections.
Siya nahimutang sa ika-siyam nga pwesto.
Siya ang kanhi officer-in-charge (OIC) department head sa Human Resource Development Office (HRDO) sa panahon ni kanhi Mayor Tomas Osmeña.
Si Abella aduna nay gihambin nga balatian dihang anaa pa siya sa Cebu City Hall hangtod nga gikuha siya ni Osmeña isip iyang kandidato pagkakonsehal sa miaging tuig.
Hangtod sa pagsuwat ning taho, wa pa matino ang sakit nga maoy hinungdan sa iyang kamatayon.
Apan sa Facebook post ni Congressman Rodrigo Abellanosa nga sakop sa BOPK, siya nakadungog nga multiple organ failure ang namatyan ni Abella.
Kini tungod gall stones nga nakamugna og pancreatitis nga niapekto sa iyang kidney, apan iyang giklaro nga di pa kini kumpirmado. Si Mayor Edgardo Labella nipangat usab sa iyang pahasubo sa pamilyang Abella. (PAC)