AKONG nasabtan ang pipila ka mga magbabalaod ilabi na ang atong Pangulong Rodrigo Duterte nga nagsulti nga maayo nga magpabiling suspendido ang klase sa tibuok nasud hangtu nga makabaton na kita og bakuna kontra Covid-19.
Kini ang bag-ong katikaran human ang Department of Education (DepEd) ablihan ang school year 2020-2021 karong Agusto 24.
Tungod niini, nabahin ang katawhan tungod kay dunay pabor nga suspensuhon ang klase tungod sa kaluwasan sa mga kabataan.
Duna say daghang nagsulti nga sayang ang tuig kung mahitabo kini sanglit daghan ang paagi sa pagtudlo.
Tubag sab sa mga pabor nga mahikawan sa edukasyon ang walay access sa internet nga mga estudyante.
Nasayud ko nga nahibalo na ang DepEd sa nagkadaiyang paagi sa pagtudlo sa mga bata sama sa Online Blended Delivery (OBD) ug Distance Education Delivery (DED) nga gihimo na sa mga dagkong unibersidad panahon sa lockdown.
Ang Blended Learning kombinasyon kini sa online learning ug on-campus learning diin dunay eskedyul nga magkita ang estudyante ug magtutudlo.
Ang Distance Education nagpasabot nga off-campus learning nga pwede ra kaayong himuon nga walay internet.
Ako kining gipresenta dinhi sa pamasin ako nga makita sa mga policymakers.
Sa mga siyudad sama sa Metro Manila, Metro Cebu ug Davao City diin taas ang kaso sa Covid-19, mahimo ra nga hangupon ang duha ka matang sa learning delivery mode sa pagtudlo sa mga bata.
Samtang, sa mga probinsya nga walay koneksyon sa internet apan walay kaso sa Covid-19, mahimo ra nga gamiton ang Distance Education.
Aron masusi sa magtutudlo ang output sa mga bata base module nga ilang gamiton, mahimo nga bahinon ang mga bata sa lima ka grupo ug matag grupo dunay usa ka adlaw nga eskedyul sa pagpakita sa ilang magtutudlo.
Pinaagi niini, di magdasok ang mga bata sa eskwelahan ug tataw nga mapatuman ang social distancing ug uban pang health protocols.
Kining Distance Learning Education gihimo na kini sa mga pribadong tunghaan. Gani, daghan sa akong mga kaila nga dagko nag ranggo sa pribado ug gobyerno nga natapos sa Sunday School Program.
Pananglitan makita kini nga paagi sa mga magbabalaod, labing seguro nga di maguol ang mga tag-iya ug empleyado sa mga pribadong tunghaan nga mamatay sa gutom kung suspendido ang klase sa pipila ka tuig.