DAGHAN ang nabalaka nga mga Dabawenyo basin unya og mahatagan na sab og lugway ang genera community quarantine (GCQ) nga taman lang sa Mayo 31, 2020.
Dili ikalimod nga moingon ang kadaghanan nga "kapoy na sa balay" ug "gusto na nga mag-negusyo" [labi na sa mga restawran], busa dili malikayan nga maguol kay basin unya og naa pa'y lugway ang GCQ.
Kung hunahunaon kaayohan sa tanan ang gihimong lockdown, apan lagi, mao kini, dili sab puwede nga mag-sige nalang kay mahugno gyod pag-ayo ang ekonomiya ug lagmit makulban og panudlanan ang gobyerno, kay mag-sige man og ayuda sa wala naka-trabaho nga katawhan.
Busa, walay duha-duha nga mibutyag ni Davao City Mayor Sara Duterte-Carpio nga dili puwede mag duha ka bulan ang lockdown gumikan dili makaya sa gobyerno ning lokal.
"Wala tay 2-months nga lockdown because we cannot afford nga mag two-months lockdown. Although naay mga tawo nga kayahon nila nga 2-months dili mogawas sa ilang balay, ug mas daghan pod ang mga tawo nga dili pwede mag 2-months lockdown," butyag ni Mayor Sara.
Dugang niya, "Atoang ginabuhat karon gina-manage nato ang mga confirmed Covid-19 cases, ginapa-paspasan nato ang pagpangita sa ilahang mga direct physical and close contacts, and of course kung moabot ta sa punto nga daghan mamatay, mag-cremate ta ug mag-mass grave ta."
Luyo sa tanan, nagpasalamat ang mayor nga karon paspas na ang pagkabalo kung kompermado ba nga kaso subay sa mga gihimong rapid-testing.
"Ang importante lang i-manage lang nato og tarong, kay dili man gyud na mawala [kay walay vaccine]. Ang maayo gani karon kay naay mas paspas nga testing, kaniadto dugay kaayo 7-8 days. So karon, mas paspas pa gyod nga mogawas ang result," sumpay ni Mayor Sara.
Kung taman lang sa Mayo 31, 2020 ang lockdown, unta nakat-on ang katawhan sa mga angay buhaton nga ginahimo atol sa enhanced community quarantine (ECQ) ug GCQ. Dili gyod magpatuyang sa paggawas-gawas kung walay kinahanglan kay ania pa ang Covid sa taas niya nga estado samtang hinay-hinay nang wagtangon ang GCQ.
Ang pag-amping ug ang paghimo sa mga nakat-onan sa ECQ ug GCQ maoy labing importante nga buhaton sa katawhan kung wala nay lockdown aron dili mabutang sa kaalautan.