COTABATO CITY -- Usa ka parallel investigation ang gilusad karon sa mga otoridad labot sa kamatayon sa duha ka mga bata ug pagkaangol sa laing 14 ka mga tawo human sila nabuthan og eksplosibo didto sa Barangay Kitango, Datu Saudi Ampatuan, Maguindanao.
Niining kasamtangan, nag-imbestiga na ang mga opisyal sa Bangsamoro Autonomous Region in Muslim Mindanao (Barmm) nga gipangulohan ni Interim Chief Minister Ahod "Murad" Ebrahim.
Naila ang mga napatay nga sila Aslamiah Tambak, 10 anyos, ug igsuon niya nga si Sadam Tambak, 7 anyos.
Naangol sab sila Noraisa Tambak, 40 anyos, inahan sa duha ka bata nga namatay; Norsaid Tambak, 5 anyos; Badria Ebus, 35; Saud Ebus, 7; Aida Kembeg, 35; Tata Kembeg, 30; Najima Pua (PWD), 16; Jepu Pua, 15; Muslima Tambak, 40; Mati Ali, 45; Mia Elian 20; Salonga Marcos, 20; ug si Halid Dagedeban, 21, pulos molupyo sa Barangay Kitango, Datu Saudi Ampatuan, Maguindanao.
Una nga giluhatan ni Datu Saudi Ampatuan Municipal Administrator Musib Tan nga samtang nagdula-dula ang mga bata dungan sa Eid Fit'r, kalit lang mibusikad ang bala sa 81 mm mortar nga miigo sa balay sa pamilya Tambak.
Tungod sa kakusog sa pagbusikad sa eksplosibo, duha ka bata ang nabugtoan sa kinabuhi ug katorse ang naangol.
Ang mga samaron gilayong gisapupo sa ilang pamilya diin gidala sila sa Maguindanao Provincial Hospital ug Cotabato Regional and Medical Center (CRMC) sa Cotabato City.
Gawas sab niini, ang Barmm-CHR nag-imbestiga na sab ug ang Western Mindanao Command nga gipangulohan ni Lieutenant General Cirilito Sobejana, 6th Infantry (Kampilan) Division chief, Major Diosdado Carreon ug Maguindanao PNP ubos sa liderato ni Colonel Arnold Santiago.
Gikomperma sab ni MLGO Minister ug Barmm spokesman Naquib Sinarimba nga gawas sa bala sa 81 mm mortar nga miigo sa balay sa pamilya Tambak, laing tulo ba ka 81 mm high explosive ang mibusikad sa Barangay Kitango duol sa una nga pagbuto.
Naghangyo sab si Sinarimbo sa katawhan nga likayan una ang pagpagawas og pamahayag nga magsugnod sa hitabo samtang nagpadayon ang imbestigasyon sa mga otoridad.
Sa kasamtangan dunay grupo na sab nga gitahasan si Maguindanao Governor Bai Mariam Sangki Mangudadatu nga mag-imbestiga kalabutan sa maong hitabo. (Edgar Fuerzas)