Naay nagpositibo sa testing sa Agdao market

DUNAY mga nag-positibo sa unang adlaw sa gihimong rapid testing sa mga vendors ug laborers sa Agdao Public Market sa Davao City.

Kini ang gibutyag ni Dr. Josephine Villafuerte, head sa City Health Office (CHO) ning dakbayan, diin sa unang adlaw, naa nay upat ang nagpositibo.

"Daghan pa ang atong ipaubos sa testing. Kapin libo ni ka mga taga Agdao Public Market, so dapat magpa-test sila tanan karong semanaha kay dili nata modawat og walk-in. Kung dili sila makapaubos sa test dili sila tugutan nga makatinda og balik. Ang rapid testing gihimo diha lang gihapon sa sulod sa Agdao market," ingon ni Villafuerte.

Una niini, gibutyag ni Davao City Mayor Sara Duterte-Carpio nga temporaryo nga sirad-an ang Agdao Market aron kahatagan og higayon nga makapa-test ang dul-an 3,000 ka mga vendors ug laborers.

Ang mayor nagbutyag human giingong dunay mga nag-positibo sa coronavirus disease (Covid-19) sa maong palengke.

Sunod-sunod sab nga dunay mga nagpositibo sa Barangay Leon Garcia, Agdao District diin sagad sa mga residente niini nga barangay sa Agdao Market mamalengke ug ang uban sa maong palengke nanginabuhi.

Adlaw'ng Lunes gisugdan ang pag-test sa mga vendors ug laborers diin duna dayon nagpositibo kanila, apan ipailawom pa kini sa kompermasyon aron matawag kining confirmed case subay sa protocol sa health department.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph