Bisan may lockdown, armado nakapatay

MAGSAYSAY, Davao del Sur -- Usa ka 23-anyos nga mag-uuma ang gipusil sud sa iyang balay didto sa Barangay Tagaytay Lunes sa gabii, Mayo 25, sumala sa Magsaysay Municipal Police Station.

Si Jerwin Masamloc Tiban, minyo nga sakop sa tribung B'laan, ang mihimo og buluhaton sa ilang kusina human ang panihapon, dihang kalit giluthang sa mga wa mailhing mamumuno gamit ang di pa masutang kalibre sa armas.

Matod ni Major Jeffmar Tercero, hepe sa kapolisan sa lugar, nga ang biktima nahiagoman og mga samad pinusilan sa iyang dughan, liog ug ulo.

Gitataw ni Tercero nga daling gidala sa iyang mga kabanay ang biktima padung sa Viacrusis Medical Hospital didto sa silingang lungsod sa Bansalan, Davao del Sur apan gideklarang dead on arrival sa mga nag-atimang doktor.

Ang opisyal midason nga mihimo na sila og lawom nga imbestigasyon hayan masuta ang motibo sa krimen ug mailhan ang bansagon sa mga mikagiw nga suspek.

Nahitabo ang insidente samtang padayong giawhag sa mga opisyal sa barangay nga magpuyo sud sa balay ang ilang mga molupyo samtang gikabalak-an pa ang pagtakboy sa coronavirus disease (Covid-19). (Orlando B. Dinoy)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph