Anak namukaw sa papa, gipatay

GIPATAY: Si Reynaldo Suize nadakpan sa kapulisan human niya giingong patya ang iyang anak nga si Rey Vincent, 24, kinsa nipukaw kaniya aron unta siya pabalhinon sa pagkatulog. Nasakmit gikan kaniya ang plamingko nga iyang gigamit pagpatay sa iyang anak. (Gikan sa Dumanjug Police Station)
GIPATAY: Si Reynaldo Suize nadakpan sa kapulisan human niya giingong patya ang iyang anak nga si Rey Vincent, 24, kinsa nipukaw kaniya aron unta siya pabalhinon sa pagkatulog. Nasakmit gikan kaniya ang plamingko nga iyang gigamit pagpatay sa iyang anak. (Gikan sa Dumanjug Police Station)

PATAY nang niabot sa tambalanan ang usa ka 24 anyos nga anak lalake human dunggaba sa iyang amahan nga hubog nga iyang gipukaw kay natulog sa ilang tugkaran sa Martes, alas 12 sa kaadlawon, Mayo 26, 2020.

Giila ni Police Major Ardioleto Cabagnot ang namatay nga si Rey Vincent Suize, 24, drayber samtang suspek mao si Reynaldo, puro taga Barangay Bitoon, Dumanjug.

Si Cabagnot, hepe sa kapulisan, niingon nga naabtan ni Rey ang iyang amahan nga natulog sa ilang tugkaran.

Iyang gipukaw ang iyang amahan aron unta pabalhinon og katug sa ilang balay.

Wa pa mahuwasi si Reynaldo sa kahubog, nasuko na hinuon kini dihang giagak sa anak hinungdan nga silang duha nagkalalis.

Nikuha og kutsilyo si Reynaldo ug gidunggab si Rey Vincent sa tiyan.

Daling gidala si Rey Vincent sa tambalanan, apan wan a matabang sa doktor, namatay.

Si Reynaldo nadakpan sa hot pursuit operation sa kapulisan ug gibilanggo na sa Dumanjug Police Station.

Kasong parricide ang ipasaka batok kaniya.

Nanigbas, namatay

Samtang, mag-uuma nasuko nga gibalibaran sa tagay, nanigbas.

Apan siya maoy namatay kay ang iyang gibunalan nagkupot og kahoy, maoy nibunal bunal kaniya atoll sa ilang kumbate niadtong Lunes sa gabii, Mayo 25, 2020 sa Sitio Luray, Brgy. Libjo, lungsod sa Tabogon.

Ang biktima giilang si Diosdado Espinosa, 67, minyo, taga Purok Lumboy, Brgy.Mabuli, samtang nasikop ang suspek nga si Sergio Lepalam, 51, minyo, mag-uuma, taga Brgy. Libjo.

Si Police Staff Sgt. John Paul Armero, sa Tabogon Police Station nga nahinabi sa Superbalita Cebu, nagkanayon nga si Espinosa niangkon sa kremin.

Matod ni Armero nga si Espinosa nag-inom og bino Kulafu ug giagda si Lepalam nga mag-inom.

Iyang gibalibaran si Lepalam kay duna pa siyay importanti nga pagabuhaton.

Nasuko na hinuon si Lepalam hinungdan sa ilang panaglalis ni Espinosa.

Giingong kalit nga nilanit sa sanggot si Lepalam ug gihapsan si Espinosa, kinsa naigo sa tuong bugan.

Bisan kon samaran, nakadagan pa si Espinosa, nakakuhag kahoy hinungdan nga nakabawos sa pagbunal kang Lepalam.

Naigo sa nagkadaiyang bahin sa lawas si Lepalam hinungdan nga namatay.

Si Espinosa nibutyag nga nagkasungi sila ni Lepalam sa miaging simana tungod kay wa sila magkasinabot sa ilang gipangsanggi nga mais. (GPL)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph