MGA local stranded individuals (LSI) sa dakbayan sa Mandaue adto ra sa barangay hall magpahibawo sa ilang intensyon nga mouli na sa ilang residensya.
Adunay gitahasan nga focal person ang kada barangay nga moatiman niining mga LSI.
Gipasabot ni Atty. John Eddu Ibañez, ang executive secretary ni Mandaue City Mayor Jonas Cortes, nga aduna na silay protocol nga gihimo aron sa pagsanong sa hangyo niining mga LSI .
Adunay mga pipila ka mga LSI ang niadto sa Mandaue City Health Office (CHO) aron magkuha og mga medical certificate, usa ka requirement aron sila makapauli sa ilang probinsya o residensya.
Apan sa protocol nga gihimo sa syudad, sigon ni Ibañez nga dili na kinahanglan pa moadto sa CHO aron magprocess sa ilang certificate ug ang barangay na kung asa sila kasamtangan nga nagpuyo ang moproseso sa tanan nilang requirements.
Ang buhaton lang sa mga LSI nga mopahibawo ngadto sa barangay nga sila na-stranded.
Pinaagi sa pakigkoordinar sa focal person ngadto sa local Covid-19 task force ug sa dakbayan, i-proseso ang medical clearance nga i-isyu sa CHO.
Ang pangayuon lang aron mahatagan na og medical clearance ang maong LSI kung wala kini contact sa usa ka Covid-19 nga pasyente o dili probable o suspected sa maong virus.
Kinahanglan sab nga mopaubos sila sa Polymerase Chain Reaction swab test og 14 ka adlaw nga home quarantine.
Kung magnegatibo ang maong LSI, mahatagan na kini sa iyang medical clearance.
Sa laing bahin, sigon ni Ibañez nga aduna sab silay gihimo nga protocol alang sa mga overseas Filipino workers (OFW) nga mopauli sa dakbayan sa Mandaue.
Adunay 20 ka mga OFWs na ang nakauli sa dakbayan niadtong Lunes, Mayo 25, 2020. (KFD)