AUTOMATIC nga dismiss ang mga kaso nga gi-atubang ni Renato Llenes, ang self-confessed killer sa 16 anyos nga si Christine Lee Silawan, human naghikog-patay ang akusado niadtong Domingo, Mayo 24 sud sa selda sa Lapu-Lapu City Jail.
Apan wa magpasabot nga nakab-ot ang hustisya sa kamatayon sa maong dalaga, bisan nga nagpakamatay ang akusado.
Si Prosecutor Ruso Zaragoza nipasabot nga sa kamatayon ni Llenes dili na mapadayon sa prosecution sa maong kaso.
Kasamtangan nga wa makalahutay ang husay sa kaso batok ni Llenes sa dihang nabalda ang operasyon sa korte human gipatuman ang enhanced community quarantine (ECQ) sukad niadtong hinapos nga bahin sa Marso.
Gibana-bana nga aduna pay mga 20 ka witness nga i-presentar unta sa korte lakip na niini ang iyang live-in partner ug mga silingan.
Nasayran nga si Llenes nag-atubang og kasong murder ug illegal possession of firearm may kalabutan sa kamatayon ni Silawan.
Aduna say laing kaso ang maong akusado nga pagpanglugos ug child abuse sa laing biktima.
Si Zaragoza nagkanayon nga wa mapamatud-i nga guilty beyond reasonable doubt pinaagi sa court process si Llenes busa dili masabot nga nakab-ot ang hustisya alang ni Silawan.
Kahinumduman nga napalgan nalang nga wa nay kinabuhi si Llenes sud selda sa city jail niadtong Mayo 24 gamit ang ginunting nga tshirt sa gisinapid nga maoy iyang gibaat sa iyang liog.
Gilahi og selda si Llenes sa dihang adunay death threat gikan sa uyoan sa biktima kinsa nabilanggo sab sa maong jail facility.
Si Llenes miangkon nga siya maoy responsable sa kamatayon ni Cristine Silawan kinsa napalgan nagbuy-od ug naputos ang lawas sa dinunggaban, samtang ang nawong sa biktima ang nakalabera human gilarot ang panit sa iyang dagway.
Ang lawas sa biktima nakit-an nalang sa hawan ug hilit nga bahin sa Barangay Bankal niadtong Marso 11, 2019.
Ubos sa inpluwensiya sa ginadiling drugas si Llenes atol sa maong krimen base sa iyang pangankon human siya balibare ni Silawan nga makighilawas ug gitamparos, hinungdan nga mingitngit ang iyang panan-aw. (FVQ)