UNOM ka kilo sa gituohang shabu nga mobalor og P40.8 million nasakmit sa kapulisan atol sa anti illegal drug operation niadtong Lunes, Mayo 25, 2020 sa Dakbayan sa Tagbilaran, Bohol.
Lima ka drug personalities nangadakpan sa managlahing mga buy-bust.
Ang operasyon hiniusang gipahigayon sa Regional Drug Enforcement Unit 7, inabagan sa Bohol Provincial Drug Enforcement Unit, Provincial Intelligence Branch, Tagbilaran City Police Station ug Philippine Drug Enforcement Agency 7.
Unang nadakpan alas 5:45 sa hapon sa mao nga adlaw sa sitio Antipolo, Barangay Dampas, Dakbayan sa Tagbilaran, Bohol mao silang Lelit Sinugbojan, 44, lumad nga taga dakbayan sa Lapu-Lapu; Chellomae Pescura Curayag, 34,taga Inabangag; Junalyn Abelgas Matora, 33, taga Dauis, ug Humprey Millana Cenabe, 33, taga lungsod sa Inabanga.
Nakuha gikan kanila ang duha ka kilong shabu nga mobalor og P13.6 million.
Sa imbestigasyon, nitug-an ang usa kanila kon asa sila mokuha sa supply sa illegal nga drugas.
Follow-up
Alas 6:45 sa gabii, gihimo dayon ang follow-up operation sa Purok 2, Barangay Tanghaligi, lungsod sa Talibon nga niresulta sa pagkasikop ni Jaime Auxtero Dajao, 44.
Si Dajao nakuhaan sa iyang posisyon og upat ka kilo sa gituohang shabu nga mobalor og P27.2 million.
Matod ni Police Brigadier General Albert Ignatius Ferro, hepe sa Police Regional Office 7, nga ang lima nga nadakpan usa ra ka grupo.
Ilang gisubay sa pagkakaron kon asa sila konektado nga drug group tungod kay adunay mga impormasyon nga di pa nila ikabutyag sa publiko.
“They have connections. So, we are still on the intelligence analysis phase of having a good analytics on the relationship of these perpetrators, these drug peddlers. Because we have some other operations we cannot yet divulge,” matod ni Ferro.
Gipaubos na karon sa imbestigasyon ang mga dinakpan kon asa gipaagi ang illegal nga drugas taliwala sa pagpatuman sa general community quarantine sa tibuok Bohol.
Dugang ni Ferro nga ang maong illegal nga drugas nga nasakmit gikan sa usa ka drug triad nga nag supply sa Pilipinas tungod sa pamaagi sa pagputos niini nga gisulod sa usa ka tea bag.
“Based on the wrapping, we could deduce that those are coming from the triad,” dugang ni Ferro.
Cebu connection
Si Police Colonel Joselito Clarito, officer-in-charge sa Bohol Provincial Police Office, nagkanayon nga malampuson nga anti drug operation resulta sa kapin sa usa ka buwan nga surveillance nga inabagan sa Regional Intelligence Division sa PRO-7.
Iyang gibutyag nga dako ang posibilidad nga adunay koneksyon sa mga drug personality dinhi sa Sugbo ang mga nadakpan sa Bohol tungod sa packaging sa illegal nga drugas.
“Somehow meron po silang connection at makikita nyo naman, Sir, sa packaging ng drugs confiscated na talagang ang mga ito ay Chinese tea bags. Meaning to say they came from the triad, the Golden Triangle ito naman ang na pro-produce ng modus operandi,”matod ni Clarito.
Marijuana
Moabot ngadto sa 7,500 ka punoan sa marijuana ang naibot sa Danao City Police Station inabagan sa Provincial Intelligence Branch, Provincial Drug Enforcement Unit sa Cebu Provincial Police Office ug Philippine Drug Enforcement Agency sa Barangay Langosig, bukirang dapit sa Dakbayan sa Danao.
Alas 10:30 Lunes sa buntag, Mayo 25, girumbo sa kapulisan ang hilit nga dapit sa Barangay Langosig.
Ilang nadiskobrehan ang himsog ug mahimo na nga ma-harvest nga mga punoan sa marijuana nga mobalor og P3 million.
Nadakpan hinuon sa kapulisan ang duha ka magsuong suspek nga maoy nananom nga silang Ariel De Leon Lawas, 23, ug Jeaven De Leon Lawas, 20, nagpuyo ra usab sa maong dapit.
Matod ni Police Colonel Roderick Mariano, hepe sa kapulisan sa probinsya sa Sugbo, nga bisan kon gipaubos pa sa GCQ ang tibuok lalawigan, padayon sila sa pag monitor sa mga dapit nga adunay marijuana plantation.
Niadtong miaging semana naka dawat og impormasyon ang Danao City police station labot sa marijuana plantation sa maong barangay hinungdan nga ilang gilusad ang surveillance.
Human masuta nga tinuod ang taho, ila gilayon gihimo ang operation.
Dugang ni Mariano nga magpadayon ang ilang monitoring sa mga lugar sa probinsya sa Sugbo nga adunay gipangtanom nga marijuana.
“Continuous yung ating monitoring with the help ng ating mga BPATS as well as mga barangay information network natin. Kasunod lang to sa ating nakaraang accomplishment na nagkaroon din tayo ng marijuana eradication doon sa Toledo City,” matod ni Mariano. (AYB)