WAY bakuna, way klase.
Mao ni ang gisulti ni Presidente Rodrigo Duterte sa usa ka tigom uban sa pinili nga mga opisyal niadtong Lunes sa gabii, Mayo 25, 2020.
Kon mahitabo, hayan di mabuksan ang klase, sumala sa target sa Department of Education (DepEd), sa Agusto 24, 2020.
"I will not allow the opening of classes na magdikit-dikit 'yang mga bata. Bahala na hindi na makatapos. For this generation, wala nang makatapos na doktor, pati engineer," matod sa Presidente.
Nabalaka siya sa seguridad sa mga bata gikan sa coronavirus disease (Covid-19).
“Wala nang aral, laro na lang, unless I am sure they are really safe," dugang ni Duterte.
Gihulagway pa sa Presidente nga way gamit kon moabli ang klase nga wala pa’y bakuna tungod kay risgo sa mga tinun-an.
"It's useless to be talking about opening of classes. Para sa akin, bakuna muna," matod sa Presidente.
Si DepEd Secretary Leonor Briones nipahibawo na unta nga sa Agusto 24 magsugod ang klase sa school year 2020-2021.
Sa pagsuwat ning taho, wa pay pamahayag nga giluwatan si Briones.
Si Briones niingon hinuon nga ang mga tinun-an ug magtutudlo wa kinahanglana nga mo-report sa tunghaan kada adlaw.
Ilang gitrabaho ang paghimo og mga pamaagi sa pagtudlo nga mogamit sa digital platforms.
Nagkadaiyang nga pamaagi sa pagtudlo ang giandam karon sa DepEd tungod sa “new normal.”
Kini naglakip sa online o virtual class pinaagi sa internet ug blended learning o kining ka usa ra motungha sa tunghaan ang tinun-an, hatagan ra kini og assignment sa nahabilin nga mga adlaw sa semana.
Enrollment
Samtang magsugod ang enrollment karong Hunyo 1 hangtod Hunyo 30.
Si DepEd 7 Regional Director Salustiano Jimenez Jr. nagkanayon nga wa pa sila makadawat og mando gikan sa ilahang ulohang buhata.
Sa pagkakaron, padayon ang ilang preparasyon subay sa unang giluwatan nila nga schedule of activities.
“We are awaiting for the order. If there is an order from the Secretary, then we will abide. For now, we will continue with our preparations cause we do not know what will happen next,” si Jimenez sa text message niini sa Superbalita Cebu.
Nakaani ang DepEd og negatibo nga komentaryo gikan sa mga ginikanan human nipahibawo nga mobalik na ang klase sa Agusto 24 taliwa sa daghang mga kaso sa Covid-19 sa nasod.
Sa Central Visayas, ang Dakbayan sa Sugbo ug Mandaue City nalang ang gipaubos sa enhanced community quarantine (ECQ).
Ang Cebu City usab ang labing daghan og mga kaso sa Covid-19 sa Central Visayas. (MVI, JTM, HBL, Sun Star Philippines)