WA DAMHA ni Sol Eugenio nga makasud sa Hollywood tungod kay by profession usa gyud siya ka ballroom dancer-instructor.
Ang labing una niyang international acting project ang American TV series nga “Almost Paradise” nga gibituonan sa sikat nga Hollywood actor Christian Kane.
Ang “Almost Paradise” gisalida na karon sa WGN America diin si Sol Eugenio nidala isip batabata sa Shanghai triad crime lord Big Sister Ling nga gihatagan og kinabuhi sa Pinay actress Isay Alvarez.
Sa “A Wedding to Die For Almost Paradise: Episode 9” ubos sa direksyon ni Hannah Espia, si Kai Mendoza (Samantha Richelle) ang gisugo nga mag-undercover sa kasal sa usa ka banggiitang triad boss nga niresulta sa duguong hitabo.
Naa sad dinhi ang mga paborito ninyong Pinoy aktor nga silang Nonie Buencamino, Boom Labrusca, Ces Quesada ug Divine Maitland-Smith.
Si Sol apil sad sa upcoming film “The Fashion Hero” nga gitakdang i-shoot gikan August 29-September 23, 2020 ug sa usa ka international reality show.
Si Sol Eugenio natawo niadtong Marso 11, 1972 sa Cainta, Rizal, Philippines apan giisip niya ang iyang kaugalingon nga Cebuano tungod sa kadugay na siyang nagbase sa Sugbo isip professional dancer, theater actor ug event organizer.
Ang 48-anyos nga aktor nihulagway sa iyang kaugalingon nga big fan sa Broadway shows ug theater sukad sa iyang pagkabata.