SUPERBALITA CEBU

Diputado: Kanus-a kaha mouli o mobalik sa probinsiya?

Cuentas claras

NINDOT kaayo paminawon ang programa nga gitawag og 'Balik-Probinsiya.'

Tiaw bay kadtong moapil makadawat og daghang allowances nga P35,000 alang sa transportation, P60,000 alang sa transitional nga pwede og pagkaon o laing butang uog lain pa nga P15,000 para sa livelihood.

Pero dili pa madawat dayon ang maong kwarta, ahem, unya ra madawat kon tua na sa probinsiya ang aplikante unya 'by-installment.'

Gawas pa niana, duna pud kuno mga trabaho nga naghulat kanila, base sa ilang qualification nga ilang gisulat sa application forms.

Kadtong mga walay balay nga kapuy-an sa probinsiya, adunay pahulam para housing loan gikan sa Pag-IBIG, National Housing Authority ug gikan sa National Home Mortgage Finance Corporation.

Gawas sa lalawigan sa Bohol, miapil sab sa pilot project ang mga lalawigan sa Leyte, Camarines Sur, Lanao del Norte, Marinduque, Negros Occidental, Negros Oriental, Pangasinan, Quirino Province, Samar, Zamboanga del Norte ug Zamboanga del Sur.

Sus, kon tinuod man gani ang maong mga ayuda, pagkanindot gyod kaayo.

•••

Tinuod kaha kini? Aduna na bay kwarta o pundo para sa maong programa? Kanang giingon nila nga trabaho, tinuod kaha na? Pasabot, adunay trabaho nga gahulat sa ilang pag-uli sa probinsiya? Trabaho sa gobierno o trabaho sa pribado?

Lisod man god sabton kining maong saad kay daghan baya diri sa probinsiya ang walay trabaho kay gaawas-awas ang nag-apply.

Labi na gyod kay daghan sa mga kompaniya ang nagsira sa negosyo tungod sa Covid-19. Unya dugangan pa kini sa mga moabot nga apil sa Balik Probinsiya program.

Daghan ang nawad-an og trabaho tungod sa Covid-19. Kining mga tawhana ang buhi nga mga casualty sa Covid-19. Kining mga tawhana ang una nga mangita og trabaho inig ka-libkas na sa kwarantinas.

Dugangan pa sa mga nangabot nga gikan sa Manila, may mga trabaho pa ba kaha nga makit-an ning mga tawhana?

•••

Ang bahin sa kwarta o pundo, duna ba kahay masungkit nga gahin ang kagamhanan niini?

Kahinumdoman, kon dunay panagtagbo sa mga kongresista aron tukion ang budget sa nasodnong pangagamhanan, usa lang ka isyo ang kasagaran nimo madungog nga hisgotan.

Unsa man ang maong isyu? Farm to market road o FMR.

Daghan sa mga kongresista ang ganahan kaayo motuki og FMR, mas dako nga FMR, mas maayo. Bahala na ang uban basta maseguro lang ang iyang dakong FMR. Kon dako nga pahat sa national budget gigahin na sa FMR, duna pa ba kahay mahibilin para sa ayuda sa Balik Probinsiya?

Labi na kay gidak-an sab ang budget sa DSWD para sa 4Ps.

•••

Kanus-a pa kaha mo-eskapo ning bisita nga dili welcome?

Daghan na ang nabiktima niining maong bisita – buhi ug patay nga mga biktima.

Daghan ang naghambin sa kahadlok adlaw ug gabii kon kanus-a mosulod sa ilang kinabuhi kining bisita nga ginganlan og Covid-19.

Apan kay dili makita, dili masimhot, way kasayoran ang mga katawhan kon asa ug kanus-a kini mosulod.

Manghinaot lang kita nga mogawas na kining maong bisita nga dili welcome sa atong nasod.


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph