PARA nako, di angayan nga kahadlukan kaayo ang Covid-19 nga miigo sa siyudad sa Sugbo.
Apan dili angayang mokompyansa ang katawhan. Sundon ug tahuron ang mga lagda sa siyuda. Tinuod, ang siyudad sa Sugbo numero uno sa tibuok Pilipinas sa gidaghanon sa mga positibo sa Covid-19 apan gamay ang namatay.
Ug ang mga nahimong positive wala magluya, himsog ilang panglawas ug naka-recovered na ang kadaghanan kanila.
Wala na usab maka-lockdown ang mga lugar nga sentro sa Covid-19 sa dakbayan, sama sa Sitio Zapatera sa Barangay Luz.
Sila si Mayor Edgardo Labella ug Konsehal Raymond Garcia nangunay sa kampanya batok sa Covid-19.
Gani gidayeg ang local government unit (LGU) sa Cebu City sa usa sa mga ahensya sa nasudnong gobyerno sa kampanya batok sa Covid-19.
Ang Cebu City wa pa mapaubos sa general community quarantine (GCQ), naa pa sa enhanced community quarantine (ECQ). Apan, komportabli ko nga kini mapaubos na sa GCQ.
Gullas, Derama
Mibati og kabalaka si Talisay City Mayor Samsam Gullas, dunay dugang positive sa iyang teritoryo.
Atong hangyuon ang mga molupyo sa pagsunod sa lagda. Bisan pa man gamay ra ang kaso ug mas gamay pa ang namatay.
Sa lungsod sa Boljoon, way positive sa Covid-19 pero nagbaha ang ayuda nga nadawat sa katawhan.
Karon anaa na sa 3rd wave ang pagpanghatag nila ni Mayor Merlou Derama, Vice Mayor Villanueva ug mga Konsehal sa mga bugas ug uban pang panginahanglan.
Wa sab mokompyansa si Derama sa isyu sa Covid-19 pinaagi sa pahimangno sa katawhan nga tahuron ug sundon ang lagda nga gipatuman ni Gobernador Gwen Garcia ubos sa GCQ ang probinsya.
Si Derama nakadawat ug pasidungog sa Department of Social Welfare and Development (DSWD) 7 sa pagkab-ot sa deadline sa social amelioration program (Sap).
Usa usab ang mayor sa mipakita ug maayong ehemplo sa mga lungsod sa Sugbo sa kampanya batok sa Covid-19.
Hinuon, mayoriya sa mga lungsod sa probinsya way positibo sa Covid-19.