ANAA sa 390 ka mga motorela driver sa siyudad sa Cagayan de Oro ang nakadawat na sa ilang partial cash assistance ug gitakdang madawatan ang tibuok kantidad karong Mayo 27.
Kini pinaagi usab sa koordinasiyon sa Public Employment and Services Office (Peso) ug sa buhatan sa Department of Labor and Employment (DOLE)-Northern Mindanao niadtong Mayo 22, 2020.
Lakip kini sa programa sa nasudnong gobyerno labi na kining Tupad-BKBK (Tulong Panghanapbuhay sa Ating Displaced/Displaced Workers Program-Barangay Ko, Bahay Ko) pinaagi na usab sa DOLE-Northern Mindanao kauban ang lokal nga kagamhanan.
Gibutyag ni Peso manager Kathleen Kate Sorilla niadtong Mayo 22 atol sa press briefing sa humanitarian assistance cluster nga anaa sa 390 ang mga drayber nga nakahuman og 10 ka adlaw nga pagpanghinlo sa ilang mga tugkaran.
"We have already 390 karon nga motorela drivers nga na-complete na gyud nila ang 10-days nga pagtrabaho nila," matud ni Sorilla.
Ang mga motorela driver nga nagtrabaho sulod sa 10 ka mga adlaw ang makadawat og P3,650 samtang ang nagtrabaho lang sa lima ka adlaw makadawat usab og P1,825.
Base kini sa minimum wage rate sa Northern Mindanao diin ang non-agriculture workers anaa sa P365 matag adlaw ang suholan.
Mokabat sa 2,300 ang mga rehistradong motorela drivers sa Cagayan de Oro City ug kadaghanan niini ang nakadawat og P6,000 Social Amelioration Program cash aid gikan sa National Government.