1 barangay sa Manolo Fortich gi-lockdown

GIPATUMAN gilayon sa local nga kagamhanan sa Manolo Fortich, Bukidnon ang pag-lockdown sa usa ka barangay diin nagpuyo ang usa ka 44 anyos nga lalaki, usa ka health worker nga nagpositibo sa coronavirus disease (Covid-19).

Sa gipagawas nga pamahayag sa lokal nga kagamhanan sa lungsod, ilang gipaabot nga taga Barangay Sto. Niño sa maong lungsod ang nagpositibo hinungdan gimando ang pag-lockdown sa barangay hangtod sa Mayo 27 ning tuig.

Lakip sa gipasira usa ang Municipal Health Office aron i disenfect human dinhi nagtrabaho ang maong lalaki.

“It is not a question of if but rather a question of when. Karon adlawa gikasubo ko sa paghibalo sa katawhan sa lungsod sa Manolo Fortich Bukidnon nga mitala na sa medical bulletin sa DOH Region 10 ang unang kaso sa atong lungsod,” kini ang pahayan ni Mayor Clive Quiño atol sa local inter agency task force emergency meeting.

Gipasalig niini nga mapaningkamotan nga maprotektahan ang katawhan sa lungsod ug ma contain kini sa maayo nga paagi.

Aduna na usab gihimo nga contact tracing sa mga nakahalubilo ug nakadoul sa 44 anyos.

“Gumikan kay ang Covid 19 posibleng naa lang sa palibot, mas gikinahanglan nato ang kanunay nga pagmatngon. ang akong hangyo ug pahinumdum sa tanang katawha nga magmaampingon ug mosunod sa tanan nga gabayan nga gipatuman sa atong pangagamhanan,” hangyo sa mayor sa katawhan.