Tambagi ko Noy Kulas: Mamords

DEAR Noy Kulas,

Maayong adlaw ninyong tanan diha. Hinaut nga naa mong tanan sa kapiskay. Tawga lang ko Fausto, 53 anyos ug dugay nang fan nimo. Bag-o ra ko nagkat-on aning internet kay wa may lingaw gud sa lockdown. Laay kon wa koy kalingawan nga lain kay di man ko hilig og suroy, pero chicksboy ko kay biyudo na man ko walo ka tuig na. Tilaw tilaw na lang gani ning akoa.

Pero moabot gyud ang panahon nga maigo tag us aka babaye. Kini siya biyuda, 42 years old ug dunay duha ka mga anak nga dagko na. Sa Facebook ra mi nagkaila-ila ug nag chat chat hangtod nga nag eyeball mi kay social distancing lagi kuno ta karon. Kaway kaway lang una mi.

Nakauyon ra ming duha ug sukad ato, sige na mig chat ug call. Nagsabot mi nga kon ma-lift na ning quarantine, magsige na mi og kita. Open ra ba siya nga magminyo mi. Ang nakaapan kay akong mga anak di mosugot nga magminyo mi. Naa kuno sila nadunggan nga manghantukay ning bayhana ug basin kuno kwarta ra nako ang giapas kay negusyante man ko.

Noy, unsa kahay imong tan-aw? Mamords ra ba kaayong bayhana kay five na siyang nabiyuda unya wa na gyud kuno siya mahikapi. Na in love na ra ba kaayo ko niya. Heart o pamilya?

Fausto

Fausto,

Single man ka kay biyudo. Way makabuot nimo kon imong gustuhon nga magminyo mong duha anang bayhana. Apan sama sa pagsawom sa sapa, tinua una maayo bang kaligoan, sakto ba ang gilawmon sa tubig? Akong pasabot nga ilaha-ilaha unag maayo nang bayhana una ka mo-decide magminyo mo. Basin baya tinuod tong gisulti sa imong mga anak nga manghantukay na. Kuyaw na kay maoy makapurdoy nimo.

Okay ra man nang mangita kag mamords nga minyoan. Pero seguraduha una kon maayo lang ra ba na sa porma, way substance. Lisod r aba nang maayo rag porma kay labad sa ulo. Unya kon laagan, samot na nga maproblema ka. Busa ila-ilaha unag maayo kay basin na hinuon mabulalilyaso ka. Kataw-an lang nya nuon ka sa mga babaye nga imo rang gitilawan.

Noy Kulas