GILARAW ko ang subling pagsulti
Nga nahigugma ako kanimo.
Gusto tika nga sultihan pag-usab
Nga ikaw lang ang gituaw
Ning dughan kong uhaw
Bisan lahi na ang imong gibati.
Di ko laayang magpaabot
Sa imo unyang pagbag-o
Kay kon ang usa ka gugma matapos
May lain nga gugma mosugod.
Matahom ko nga higala
Higugmaa ako pag-usab.
Sublia ang imong gugma
Nga kanako imong gihalad.
Sa dalan kong pagalaktan
Ikaw lang ang akong padulngan.
Aron magtagbo pag-usab
Ang atong mga dalan
Ablihi ang imong kasingkasing
Pasudla ang akong gugma.
Bukha ang imong mga mata
Ug higugmaa ako pag-usab!