MAKALOWKESH! Usa ka buwang gi-suspend sa Movie and Television Review and Classification Board (MTRCB) ang morning talent-search show sa ABS-CBN nga Showtime.
Kini may kalabutan gihapon sa kontrobersiyal nga episode sa programa niadtong Enero diin nanulti og di maayo ang usa sa mga judges nga si Rosanna Roces.
Gawas sa Showtime, lakip sab sa suspension ang kadali nga mipuli sa programa nga Magpasikat.
Gisugyot sa MTRCB ang pagpasang-at og "criminal charges" batok sa ABS-CBN Head of Entertainment Production nga si Linggit Tan ug uban pang opisyal tungod sa giingong bayolasyon.
Apan ang ABS-CBN, wala na matud pa nakuratan sa maong desisyon sa MTRCB.
Una nang gimando sa MTRCB ang 20-day preventive suspension sa Showtime tungod sa pahayag ni Osang batok sa mga teachers.
Dali nga miapela ang ABS-CBN sa Court of Appeals aron nga tangtangon ang suspension. Samtang gihuwat ang desisyon, nagmugna ang istasyon og laing show nga Magpasikat.
Human sa usa ka semana, gidawat sa Court of Appeals ang apela sa Showtime pinaagi sa pagpagawas og Temporary Restraining Order mao nga nakabalik sa ere ang Showtime.
Apan ang ABS-CBN mirason nga di pa "final ug executory" ang desisyon sa MTRCB mao nga padayon pa ang Showtime bisan sa sunod semana.