NAKAUGBOK na og lawom nga kasaysayan ang Sugboanong higante nga si JuneMar Fajardo isip bugtong six-time MVP sa Philippine Basketball Association (PBA).
Apan alang sa iyang mga kauban sa San Miguel Beermen, wala pa kini nakaabot sa ilang gipangagpas nang daan nga maabot sa produkto sa University of Cebu (UC) Webmasters.
Ang beteranong forward nga si Arwind Santos mibutyag nga ang ilang gipangagpas nga makuha sa gitawag og 'The Kraken' sukad sa paghiabot niini sa Beermen mao ang walo ka MVP awards.
"Noong time na parating siya, excited na excited ako," paghinumdom ni Santos, kinsa nahimong MVP niadtong 2013 una nakasagunson si Fajardo og unom ka mga tropeyo niining labing taas nga individual award.
Giklaro ni Santos nga sa paghiabot ni Fajardo, wala na siya maghunahuna nga maangkon niya pagbalik ang MVP title.
Matod ni Santos nga ilang gisultihan ang lumad nga taga lungsod sa Pinamungajan, Cebu nga ilaha kining suportahan og insakto aron makahakot og daghang MVP awards.
"Sabi ko -- alam ni June Mar 'yan -- ikaw na 'yan. Kahit walong MVP, susuportahan ka namin. 'Wag kang mag-alala, ibibigay namin lahat sa 'yo 'yan. Sabi kong ganoon sa kanya," matod ni Santos.
Naangkon ni Fajardo ang labing una niyang MVP award niadtong 2013-14 season ug human niini, siya na ang labing dominanteng magduduwa sa labing unang professional nga liga sa tibuok Asya.
Maputol na unta ang unom ka sunodsunod nga pag-angkon ni Fajardo sa MVP title human siya nakasinati og grabeng angol sa tiil niadtong Pebrero ning tuiga. Nagkinahanglan og taas nga panahon ang pagpaalim ni Fajardo hinungdan nga dili siya makaduwa sa tibuok All-Filipino Cup.
Apan sa wala damha, ningkuyanap ang coronavirus disease 2019 (Covid-19) nga maoy hinungdan nga nahunong ang mga duwa sa All-Filipino Cup human sa opening game niini niadtong Marso 11, 2020.
Adunay posibilidad nga sa panahon nga masugpo na sa hingpit ang Covid-19, hayan hingpit na sab nga maalim ang angol ni Fajardo.
Nagtuo si Santos nga sa higayon nga makabalik na og duwa si Fajardo, dako ang poruhan nga maabot niini ang gipangagpas nga walo ka MVP titles alang kaniya. "Dalawa na lang. Sa totoo lang, walo talaga ang goal namin para sa kaniya," asoy ni Santos.
Sa pagpangulo ni Fajardo, ang Beermen nakadaog og rekord nga lima ka sunodsunod nga All-Filipino titles, duha ka Commissioner's Cup titles, ug usa ka Governor's Cup title. (ESL)