MOPAHIGAYON og elections ang Philippine Olympic Committee (POC) nga posibling himuon sa Nobiyembre ning tuiga, bisan pa man og molugak ang International Olympic Committee (IOC) kabahin niini tungod sa Covid-19 pandemic.
Kini maoy gibutyag ni POC president Abraham "Bambol" Tolentino.
Sa sayo sa niaging buwan, ang IOC ang mitugot sa National Olympic Committee (NOC) sa pagdesider kon sundon ba ang upat ka tuig nga termino sa office o kaha ang sa Olympic Games cycle. Iya usab gitugotan ang mga asosasyon nga mopahigayon og ilang kaugalingong piniliay sunod tuig.
Ang Olympics gikatakda karong tuiga sa Tokyo, Japan, apan tungod sa pandemics giuswag kini ngadto sa Hulyo sunod tuig. Samtang ang 2024 Olympics adto na usab sa Paris.
Si Tolentino, kinsa maoy pangulo sa PhilCycling, ang napili isip presidente sa POC human niya mapildi si Philip Juico, ang dako usab sa athletics sa niaging piniliay nga gipahigayon human moluwat si Ricky Vargas. (JBM)