GILUTOS na sa hiniusang puwersa sa militar ug kapulisan ang mga miyembro sa New People's Army (NPA) nga subling mi-atake sa probinsiya sa Cotabato.
Sa taho gikan Tactical Command Post sa 6th Infantry (Kampilan) Division Phillipine Army, alas 4:00 sa hapon, Marso 26, gisulong sa gibana-banaang 60 ka rebelde ang detachment sa Citizen Armed Forces Geographical Unit (CAFGU) ug 38th Infantry Battalion Philippine Army sa barangay Luz Village, M'lang.
Ang hitabo miresulta sa 45 minutos nga binakbakay sa duha ka paksiyon.
Miatras ang mga rebelde dihang nagsingabot na ang mga ginsakpan sa 57th Infantry Battalion sa Philippine Army nga miabag sa mga Cafgu.
Sa wala pa mibiya ang mga rebelde, gibitbit nila ang duha ka M16 rifles, duha ka M14, usa ka M1 carbine rifle, 14 ka M! garand rifles, mga bala.
Gikasubo sab ni M'lang Municipal Mayor Lito Pi¤ol ang kamatayon sa usa ka Cafgu nga nailang si Rex Alvarez tungod sa hitabo.
Samdan sab ang iyang duha ka mga kaubanan nga sila Wilfredo Mendoza ug Rodrigo Montijo.
Napagan sab ang mga sibilyan nga sila Rolando Castillon ug Leonardo Mara-mara, nga daling gisapupo sa mga sundalo ug gidala sa Cotabato Provincial Hospital, kun diin pabiling talandugon ang kahimtang.
Kahinumduman nga niadtong milabay nga adlaw giatngan sa mga rebelde ang grupo ni Magpet Vice-Mayor Florentino Villasor, gisunog ang ilang duha ka mga sakyanan human wala sila mihatag og campaign fee sa mga armado.
Gimando na ni Cotabato Governor Jesus Sacdalan sa kapulisan uban ang tabang sa militar ang paglutos sa mga rebelde. (Edgardo Fuerzas)