GIPAHIBAWO sa Malacañang nga magpadayon ang klase karong umaabot Agusto 24, 2020 bisan pa sa kagustohan ni Presidente Rodrigo Duterte nga way klase hangtod duna nay bakuna batok sa coronavirus disease.
Gani, magsugod na ang enrollment karong Lunes, Hunyo 1, 2020 sa tibuok nasod.
Dinhi sa Sugbo, karon pa ganing buwana nagsugod na sila sa pagpanawat og mga tinun-an, pinaagi sa internet o personal nga panag-atubang.
Nagdepende kini sa dapit diin mahaum ang mga pamaagi sa pag-enroll.
Ang dakbayan sa Sugbo nga nakabukas sa ilang online enrollment niadtong Mayo 25, nakatala na og kapin 10,000 ka enrollees.
Si Presidential spokesperson Harry Roque, sa usa ka interview sa radio, nagkanayon nga magpadayon ang enrollment sa pampubliko nga tunghaan karon nga nangandam na usab ang gobyerno sa pamaagi sa pagbukas pagbalik sa klase.
Giklaro kini ni Roque human sa naunang pamahayag ni Duterte nga dili niya tugotan ang klase kon wala pa'y bakuna batok sa Covid-19.
Dugang ni Roque nga giandam na nila ang parehong face-to-face ug blended learning nga pamaagi sa "new normal" nga klase.
Base sa schedule of activities sa DepEd, Agusto 24, 2020 hangtod Abril 20, 2021 ang school year alang sa 2020-2021.
Pamaagi
Si DepEd 7 Regional Director Salustiano Jimenez nagkanayon nga duha ka mga pamaagi ang enrollment sa mga tunghaan.
Usa niini mao ang online ug laing option ang text o tawag pinaagi sa cellphone hilabi na sa mga way access sa internet.
Dunay mga dapit nga gitugot ang panag-atubang sa ginikanan, tinun-an ug magtutudlo, apan obserbahan ang social distancing ug magsul-ob og mask.
Ang DepEd Cebu City Division nakatala na og kapin 10,000 ka enrollees sulod lang sa tulo ka adlaw nga online enrollment niini.
Gipaagi kini nila sa ilang official website nga www.depedcebucity.com.
Kon makasud ka na sa website, i-click ang online enrollment, pagpili sa year level, pili sa ngan sa tunghaan ug click sa “enroll here.”
Matod ni Cebu City Schools Division Superintendent Rhea Mar Angtud nga ang tanang mga tunghaan nag-assign og magtutudlo, nga naa nagtrabaho sa balay, isip tig-enroll.
Gawas niini, matod ni Angtud nga mamahimong manawag ang ginikanan sa mga tunghaan asa ni nila ipa-enroll ilang anak o kaha mismo sa principal.
Kon wala'y number sa ilang tunghaan mamahimo nga mangutana sa DepEd Cebu City information center sa (032) 255 1516. (HBL & JJL)