USA lang ka bag-o nga positibong kaso sa coronavirus disease (Covid-19) ang natala sa Lalawigan sa Sugbo sa Miyerkules, Mayo 27, 2020.
Kini maoy resulta sa Covid-19 test sa 43 ka swab samples nga gisumiter sa Probinsya sa Sugbo, pahibawo ni Gobernador Gwendolyn Garcia atol sa press conference sa Kapitolyo sa Miyerkules. Ang pasyente gikan sa lungsod sa Consolacion.
Siya mao ang 30-anyos nga babaye nga anaa na-admit sa Vicente Sotto Memorial Medical Center (VSMMC).
Gawas sa positibong kaso, natala usab ang 46 ka mga indibidwal nga nakasinati og Influenza like illnesses (ILI) ug usa ka severe acute respiratory illness (SARI). Sa kinatibuk-an, moabot na sa 127 ka mga kaso ang natala sa Lalawigan sa Sugbo, 27 ang naka recover ug 18 na ang namatay.
Sa maong datos, 12 ang naospital ug 17 ang anaa sa Cebu Provincial Detention and Rehabilitation Center (CPDRC) facility samtang 51 ang gi isolate sa mga isolation ug quarantine facilities. (ANV)