EX-CONVICT nga bag-o lang nakagawas sa New Bilibid Prison sa Muntinlupa gipusil patay sa duha ka wa mailhing mga lalake sa siyudad sa Danao niadtong Martes sa hapon, Mayo 26, 2020.
Ang duha ka lalake nga sakay sa usa ka sports utility vehicle (SUV) nakapahimus sa “new normal,” naka mask pagpamusil.
Patay na nga nadangat sa Danao Provincial Hospital si Juanito Flores Ole, 35, taga sityo Caputatan, Barangay Guinacot, Dakbayan sa Danao, human pusila makatulo ka mga higayon sa duha ka wa mailhing mga lalake.
Sigun ni Police Staff Sergeant Fernando Gonzales, desk officer sa Danao City Police Station, nga samtang nagpalit og banana cue si Ole alas 4 sa hapon sa Barangay Poblacion sa maong siyudad, ningduol ang duha ka mga lalake nga armadog taas ug mubo nga kalibre sa armas.
Gidiretso siya og pusil makatulo ka mga higayon nga miresulta sa pagkatumba.
Daling nanagan ang mga mamumuno sa nagpaabot nga Montero sports kolor grey ug nisibat. Nakaangkon og samad sa bukton si Ole nga nilapos sa iyang lawas.
Naa usab siyay samad sa tampihak nga nilapos sa likod sa iyang ulo. Gidali siya sa pagdala sa tambalanan sa Danao, apan gideklarar ni Dr. Hector Lim nga dead on arrival.
Si Police Lieutenant Colonel Maribel Getigan, hepe sa Danao City Police Station, sa iyang bahin, nagkanayon nga sa pagkakaron blangko pa sila kinsa ang mga killer.
Ang iyang mga imbestigador nanguha pag impormasyon sa saksi aron masayran ang mga gunman ug motibo, ilabi na nga gikan si Ole sa NBP .
Apan wala nila wad-a ang personal ug may kalabotan sa iyang pagka bilango ang hinungdan sa pagpusil patay kang Ole.
Gipasusi na usab niya ang mga kuha sa closed circuit television (CCTV) camera sa dapit.
Iyang gimandoan ang mga imbestigador nga mohimog back tracking sa mga kaso nga giatubang ni Ole aron didto sila magsugod sa ilang imbestigasyon.
“Wala pa gyud mi makahibawo unsay motive aning pagpatay. Pero naa tay nakuha sa crime scene ang cellphone which is subject pa. I-submit pa sa Regional Anti-Cyber Crime Unit 7,” matod ni Getigan.
Wa pa usab mokooperar ang asawa niini nga usa ka abogada kon unsay kaso nga gikakombikto ni Ole.
Matod ni Getigan nga anha sila magsugod sa ilang imbestigasyon.