MGA panagtapok alang sa mga relihiyusong katuyoan ug panagpundok alang sa paghatod sa batakang mga serbisyo sa kagamhanan sud sa Lalawigan sa Sugbo gitugot na.
Apan sa relihiyusong panagtapok, gikinahanglan nga di mosobra sa 10 ka mga tawo.
Gikinahanglan nga ang social distancing ug uban pa obserbahan.
Niadtong Martes, Mayo 26, si Gobernador Gwendolyn Garcia niluwat sa Executive Order (EO) 17-A, nga nag-amendar sa Section 4 sa EO 17 nga naglatid sa general community quarantine protocol, standards ug guidelines nga tumanon sa tanang mga lumolupyo sa Lalawigan sa Sugbo.
Ubos sa bag-ong mando, ang panagtapok nga lingawlingaw, mga kalihukan sa turismo ug sugal nga moresulta sa person-to-person contact, ug panagtapok sa mga grupo sa mga tawo, gidili.
Laing gidili nga panagtapok mao ang pagtan-aw og sine, concerts, paugnat sa kusog ug mga kalihukan, laing mga kalingawan ug pagpundok pundok sa komunidad.
Samtang gitugot ang panagtapok alang sa paghatag sa mga serbisyo sa kagamhanan taliwa sa hulga coronavirus disease (Covid-19), sa gihapon kinahanglan magsubay sa mga standard alang sa panglawas.
"Religious gatherings are not encouraged and shall be limited to not more than 10 persons," matod sa tipik sa EO 17-A.
Ang Inter-Agency Task Force (IATF) on Emerging Infectious Disease niluwat sa Resolution 38 sa Mayo 22, 2020, nga nagtuki sa mga kalihukan sa panatapok sa mga tawo nga gitugot sa tanang level sa community quarantine, nga naglakip sa enhanced community quarantine, modified enhanced community quarantine, general community quarantine ug modified general community quarantine, basta nasunod ang mga batakan alang sa maayong panglawas nga giluwatan sa Department of Health (DOH).
Matod sa gobernador nga dunay panginahanglan sa pagpahiuyon ug amendahan ang Section 4 sa EO 17 sa omnibus guidelines sa IATF. (RTF)