NAGHIKOG ang guwardiya human gipamusil ang duha ka kaubang guwardya, nga niresulta sa kamatayon sa usa, sa ilang security agency office sa Manuel Lim and Sons Building sa dalan A.S. Fortuna, dakbayan sa Mandaue, alas 8:40 sa buntag niadtong Huwebes, Mayo 28.
Ang duha ka biktima mao sila si Jessie Liza, 31, guard-on-duty, ug Benedicto Sumagang nga retired nga pulis ug operation officer sa ahensya, kinsa usa sa namatay.
Sigon ni Police Captain Troy John Lalamunan, hepe sa Casuntingan Police Station, human sila makadawat og alarma nga adunay shooting incident sa lugar, miresponde dayon sila kuyog ang Special Weapons and Tactics (Swat).
Pag-abot sa lugar, nakita nila si Liza nga anaa sa ground floor sa building nga samdan ug padulong na nga ihatod sa balay tambalanan.
Samtang sa ikaduhang andana, si Sumagang nakit-an nalang nga wala nay kinabuhi nga nag-akbo sa usa ka computer unit. Aduna kini duha ka mga samad pinusilan sa iyang kilid.
Nakit-an sab ang suspek nga naghigda sa iyang kaugalingong dugo ug wala nay kinabuhi.
Matod pa sa usa ka gwardya sa usa ka pawnshop kilid sa maong opisina nga si Lito Bodiongan, 44, nga niadtong orasa, nakadungog siya og duha ka buto ug wala lang siya tungod gatuo niya nga gikan kini sa construction site atbang sa maong lugar.
Apan pagkadungog niya og pipila pa ka mga buto nigawas na siya sa ilang establisemento ug gitan-aw kung asa gikan ang butobuto apan wala siyay nakita nga kagubot tungod mingaw ang kadalanan niadtong orasa.
Nahibulong nalang siya nga adunay mga pulis nga miadto sa maong lugar ug gipangutana siya kung aduna bay nagpinusilay.
Matod ni Lalamunan nga giila ang suspek nga si Reymond Alquisola, security guard nga nadestino sa usa ka buidling sa Mabolo, Cebu City.
Sa pakighisgutay sa Superbalita Cebu ni Lalamunan wala pa nila masuta ang motibo ni Alquisola kung nganong miadto kini sa opisina sa security agency.
Gikompirmar ni Lalamunan nga naghikog si Alquisola human nga gipamusil iyang mga kauban pinaagi sa pagpusil sa iyang suwang og milapos kini sa iyang ulo.
Gikahinabi na ni Lalamunan ang pamilya ni Sumagang ug sigon niini nga wala silay nailhan nga nakalalis o naka-away niini.
Anaa sa Rolling Hills Funeral Homes ang lawas ni Sumagang ug Alquisola.
Samtang, si Liza anaa gihapon sa balay tamabalan ug stable na ang iyang kahimtang. (KFD)