KAMATAYON ang misugat sa usa ka 19-anyos nga lalaki human siya giluba atol sa iyang pagtambong sa kalingawan dungan sa adlaw'ng natawhan sa iyang maguwang.

Ang maduguong selebrasyon nahitabo didto sa Sitio Bagsak, Barangay Lacaron, lungsod sa Malita, Davao del Sur, mga alas 11:40 ang takna sa gabii, Biyernes.

Sa paghulagway ni PO3 Carlito Nailes, imbestigador sa kapulisan, biktima giila nga si Jestoni Oke, ulitawo.

Ang biktima malipayon pang nakig-inom aron saulugon ang adlawng natawhan sa igsuon niining si Jorge, kuyog ang silingan nga si Brando Gumanayan.

Wa damha nga ang kalipay kalit lamang nga miresulta sa maduguong hitabo dihang kalit nga gihansakan og kutsilyo sa suspek nga si Gumanayan ang biktima.

Ang biktima nakahiagum og duha ka mga samad dinunggaban sa iyang walang dughan ug tuong bahin sa iyang tiyan, kamot.

Daling gihatod ang biktima ngadto sa Malita District Hospital apan gibalhin ra sab dayon kini sa Davao del Sur Provincial Hospital (DDSPH).

Apan igo na lamang sa pagpanglingo ang mga doktor dihang patay na nga miabot sa ospital ang 19-anyos.

Ang suspek paspas sab nga misibat human sa insidente.

Padayon pa sab nga gisubay sa kapulisan ang rason kon nganong nabuhat sa suspek ang pagluba-patay sa biktima. (Dondon Dinoy)