Ulitawo gipatay

PATAY na nga midangat sa tambalanan ang usa ka ulitawo human siya gipusil sa wa mailhing mamumuno alas 7:30 sa gabii niadtong Sabado didto sa Purok Mahayag, Barangay Buhangin, siyudad sa Davao.

Si Senior Police Officer 2 Samuel Gilay, duty investigator sa Buhanging Police Station, nagbutyag sa iyang spot report nga ang biktima nailhan sa pangalan nga John Harbe Dael, 22, nagpuyo sa Marcado Residence, Purok Mahayag.

Matud ni Gilay nga ang biktima gikatahong naglakaw pauli sa ilang balay apan giatangan siya sa mamumuno kinsa mipusil kaniya sa makaduha ka higayon gamit ang wa matino nga matang sa armas.

Si Dael naigo sa iyang likod ug ulo mao nga dali siyang gidala didto sa Davao Doctor's Hospital apan gideklara sa mga doktor nga patay na siya dihang miabot sa tambalanan.

Nasayran sa imbestigasyon sa kapulisan nga daling mibiya ang suspek ngadto sa wa matino nga lugar samtang gibiyaan ang biktima nga nagkadugo.

Nakuha sa kapulisan ang duha ka slug sa wa masayri nga armas nga maoy gigamit sa mamumuno sa krimen.

Samtang gihaya ang bitima sa punerarya, gipalawman sab sa kapulisan ang ilang imbestigasyon aron sayron kung unsa ang motibo, ilhon, sikupon, ug silotan ang mamumuno pinaagi sa pagtaral kaniya sa korte. (Alger Dura)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph