DUHA ka milyon ka pesos ang kantidad sa gikawat nga mga diamond sa wala mailhing mga kawatan sulod sa duha ka balay didto sa Bo. Obrero, Barangay 20-B Poblacion, siyudad sa Davao niadtong Biyernes.

Mga kawatan mikatkat sa sementadong koral sa alas 7:00 sa gabii sa balay nila Elizabeth Sy nga nahimutang sa # Narra Street ug Lourdes Lu nga nahimutang sa #137 Mahogany Street, Palm Village, Barangay 20-B Poblacion.

Ang blotter sa Sta. Ana Police Station nagpahibalo nga unang gisulod sa mga kawatan ang balay ni Sy pinaagi sa pagkatkat sa koral ug dihang nakasulod na sa compound giguba ang pultahan.

Giguba sab sa kawatan ang pultahan sa master's bed room ug didto gihipus ang salapi nga nagkantidad og P25,000.00 ug mga diamond nga nagkantidad og P1.7 million.

Gisulod sab sa kawatan ang balay ni Lu pinaagi sa pagkatkat sa koral sa luyo nga bahin sa balay ug dihang nakasulod na giguba ang pultahan sa maong balay.

Giingon nga sa master's bed room sab sa pamilyang Lu nakuha sa mga kawatan ang diamond nga nagkantidad og P350,000.00.

Si Police Senior Inspector Ranulfo Caba¤og, hepe sa Sta. Ana Police Station, nagtuo nga usa lang ka grupo sa mga kawatan ang miatake sa maong lugar.

Matud ni Caba¤og nga ila karong panid-an ang palibot sa maong lugar sa pamasin nga atua lang nagtago ang mga kawatan.

Nanawagan sab ang kapulisan ngadto sa katawhan nga isumbong kanila kung duna silay masayran nga mga tawo nga naghupot og diamond aron sikopon ug sukit-sukiton bahin sa nahitabong pagpangawat.