DUHA pa ka adlaw ug magsugod na usab ang bulan sa Hunyo. Mora lag way nahitabo ug hapit na diay ta sa tungatunga sa tuig.
Nakabantay ko nga sa pagsugod sa quarantine, di na ko hapit makabantay unsa nang adlawa sa semana. Kon di ka magsigeg tan-aw sa kalendaryo ug magtimaan, maglibog ka.
May mga pahibalo na nga ablihan na ang pila ka mga simbahan pero parehas sa pagsulod sa mall, may mga protocol gihapon nga tumanon sama sa pagsul-ob pa gihapon og face mask, paglimpyo sa mga kamot, paghumol sa sapatos sa footbath, pagtino sa kainiton sa lawas, social distancing ug uban pa.
Hinaut nga motuman lang gihapon ta ug di magki-at aron di masayang ang atong pag-agwanta sa quarantine sulod sa kapin sa duha ka bulan. Alang ra man gihapon kini sa atong kaayohan.
•••
Dunay nakakita kang John Lloyd Cruz nga nag-shorts lang ug niapil sa pagpatunhay sa hapsay nga dagan sa trapiko sa may barangay Guadalupe sa Cebu City.
Di hinoon ko segurado kon tinuod ba kini o fake news.
•••
Gawas sa pagtan-aw sa telebisyon ug mga pelikula sa DVD, laing kalihukan aron di mosulod ang kalaay mao ang pagpatugtog sa mga nakolekta nga mga CD ug DVD.
Lakip sa akong mga paborito mao ang sa grupong Asin, Aegis, Cueshé, Westlife, Abba ug mga solo artists nga sila si Martin Nievera, Lea Salonga, Gary Valenciano, Christian Bautista, Sharon Cuneta, Selina Sevilla, Sheryn Regis, Michael Jackson, Rod Stewart, Julio Iglesias, Enrique Iglesias, Neil Diamond ug uban pa.
Nakapangutana ko kon asa na ang Cueshé sa wa pa ang quarantine. Duha gyud ka album ning grupoha ang naa sa akong collection.
Sa wa pa sila manimpalad sa kaulohan, kaduha gyud kini nakatokar sa Oslob (parehas sa Stagecrew) tungod sa pag-imbitar ni kanhi Mayor Emelito ‘Tata’ Abines.
Sa laing bahin, nahingangha ko ni Julio Iglesias sa pagtokar sa kantang Crazy (revival sa kanta ni Patsy Cline) ug All of You (kaduweto niya si Diana Ross sa orihinal). Kinsa kaha ang kaduweto niya ning maong bersyon?
Nakalitan ko kay dunay mga linya nga Tagalog ang duha ka kanta. Nindot sab ang maong mga linya nga hubad sa orihinal nga linyang English.
Wa hinoon ko mahibulong nga nag-Tagalog si Julio kay ang iyang unang asawa nga inahan sa iyang tulo ka mga anak usa man ka Pinay. Tingali nag-Tagalog usab kini sa sila pa ni Julio.