NEGATIBO ang resulta sa swab test sa napulo ka mga close contacts sa usa ka confirmed Covid-19 patient nga locally stranded individual (LSI) sa siyudad, Mayo 28, 2020.
Kini nga mga indibidwal kauban nga pasahero lakip na healthcare worker nga nahimong close contacts sa ika-10 nga kaso sa siyudad nga usa ka 25 anyos nga taga Barangay Lumbia kinsa pabilin nga anaa sa Northern Mindanao Medical Center (NMMC) kinsa usab anaa sa stable ang kahimtang.
Gibutyag ni Dr. Joselito Retuya, epidemiologist sa City Health Office (CHO), nga na-swabbed na ang mga kaubang pasahero niini sa barko nga niabot sa siyudad niadtong Mayo 19 gikan sa Cebu City ang nakuhaan na og swab sample naidtong Dominggo ug Lunes kinsa pulos mga negatibo gawas lang niadtong taga Iligan City.
"Sa napulo nga atong na swabbed nga iyahang mga co-passengers nga ang address nila or dungan sila dinhi sa Cagayan de Oro, ang napulo atong na-swabbed apil na ang atong healthworker nga apil gihapon sa swabbing nato, negative silang tanan," matud ni Retuya.
Nagpasalamat usab kini kay ang mga kaubang pasahero nga kasamtangang anaa sa CIU pulos mga wala'y gipakitang mga sintomas kinsa lapas na sa usa ka semana sukad sa pag-abot sa dakbayan.
"Pasalamat kita nga ang ato tanan nga mga co-passengers nga naa sa atong mga CIUs City Isolation Units,wala'y gipangbati or wala'y signs and symptoms sa pagkakaron," dugang pa.
Nasayran nga sa close contacts sa maong confirmed Covid-19 nga kaso mikabat sa 65 indibidwal ang close contacts niini diin lakip ang 5 ka coast guards sa Cebu City.