Nalzaro: MECQ na ta

SA PAGSUWAT nako ning maong lindog, mao pa lang gyud ang pagpagawas sa desisyon sa Inter-Agency Task Force for the Management of Emerging Infectious Disease (IATF) nga ipa-ubos ang dakbayan sa Sugbo sa modified enhanced community quarantine (MECQ). Ang lalawigan sa Sugbo apil na ang Mandaue City ubos na sa general community quarantine (GCQ).

Una niini, si Mayor Edgardo Labella nagkanayon nga mag-agad lang siya sa experts sa panglawas sa mamahimo nilang desisyon. O ba kaha sa IATF nga mao ang policy making body ug maoy magbuot sa tanan. Depende lang usab kini sa dagan sa nagsaka nga positive cases dinhi sa dakbayan. Ang Cebu City maoy nag-una gihapon sa talaan sa pinakadaghan nga positive cases sa tibuok nasud. Apan daghan na usab ang naka-recover ug nakagawas na sa isolation centers.

Posible nga gipaminaw sa Task Force ang mga experts kabahin sa ilang desisyon. Adunay research ang experts sa University of the Philippines (UP) sa kauluhan nga gikinahanglan nga ang mga lugar nga gi-konsiderar nga ‘high risk’ sama sa Metro Manila ug Cebu City magpabilin sa ilang hugot nga restrictions. Buot ipasabot nga bisan kon ubos na kita sa MECQ, pahugtan gihapon nato ang restrictions aron dili gyud mokuyanap ang coronavirus. Ang mga mayor sa Metro Manila nagkahi-usa usab nga ipaubos sa MECQ.

Bisan kon MECQ na ta, gamay ra ang kausaban niini kay sa ECQ. Gamay ra mobukas nga shopping malls, labi pa ang essentials ug wala gihapoy public transportation. Gikinahanglan gihapon ang makuti ug mabinantayon nga pagtimbang-timbang alang sa tanang lugar kon molugak na ba o mopadayon pa pagpahugot sa lagda batok sa Covid 19.

Kay bisan og molugak ta gamay, dili pa man gihapon mawala ang Covid ug magpabilin kini hangtod nga walay vaccine nga madiskobre.

Ning maong status, medyo mobalik na gamay ang dagan sa ekonomiya kay tugutan naman mobukas ang ubang patigayon. Karon, nagamit ba ang resulta sa rapid test nga gipahigayon? Morag wala man kay tan-aw nako ang IATF maoy nagbuot ning tanan. Ang ato lang nga mosunod kita sa ilang kamanduan.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph