SA TIBUOK nasod, ang Cebu City na lang ang nagpabilin sa modified enhanced community quarantine (MECQ) kay ang tanan, naa na sa general community quarantine (GCQ) nga ubos lang og gamay sa normal.
Nakita sa Inter-Agency Task Force for the Management of Emerging Infectious Diseases nga taas pa ang risgo sa pagpanakod sa coronavirus disease (Covid-19) sa Dakbayan sa Sugbo.
Hapit kada adlaw nag-double digit ang gidaghanon sa mga nagpositibo sa Covid. Sagad ra ba, asymptomatic.
Ang Dakbayan sa Sugbo dako kaayo og papel sa ekonomiya di lang sa isla, kon di sa Kabisay-an ug Mindanao. Sa gawas sa Metro Manila, ang Sugbo maoy labing dako nga ekonomiya. Sentro sa patigayon sa Kabisay-an ug Mindanao. Kon ang Dakbayan sa Sugbo magpabilin nga higpit ang quarantine status, diin limitado gihapon ang iyang ekonomikanhong mga kalihukan, dako kini og epekto di lang Sugbo, apil na sa ubang mga dapit sa nasod.
Bisan gani ang Metro Manila maapektuhan kay sumpay og ekonomikanhong tinai ang duha ka mga dapit. Hain kahay maayo nga tugotan sa IATF ang Dakbayan sa Sugbo nga ipaubos sa GCQ aron mahibalik sa 90 porsyento nga normal?
Sa dagan gud karon, makita na man ang hulagway sa kahimtang sa Covid infections sa dakbayan. Nagbalikbalik na ang infections sa mga barangay nga apektado. Ang maayong balita kay kinabag-an ning mga dapita nagkaminos ang infections, di sama kaniadto nga tig-double digits.
Mahimo man nga ipatuman ang focused nga lockdown ning mga lugar nga apektado kaayo. Anha ibubo ang mga hinabang ug suporta samtang ang ubang mga dapit sa dakbayan lugakan na og maayo pinaagi sa GCQ. Kon di mobukas ang Dakbayan sa Sugbo sa iyang ekonomikanhong mga kalihukan, mag-antos kini, apil na ang daghang mga dapit sa nasod nga nakignegusyo dinhi. Kon di kini madali, mas grabe ang kadaut nga mahiaguman sa katawhan sa guba nga ekonomiya kay sa Covid.