NAKATUMAN sa health requirements ang 11 ka mga tinun-an sa Maguindanao nga nanguli gikan sa Dakbayan sa Sugbo, apan napalgan nga positibo sa coronavirus disease (Covid-19) sa laing test sa Mindanao.
Napailawom sila sa swab test alang sa novel coronavirus hinungdan nga naisyuhan sila og certificates alang sa mosunod nga 48 oras kun duha ka adlaw niadtong Mayo 8, 2020.
Si Cebu City Hall spokesperson Rey Gealon niklaro nga human makuha ang health requirements, nanguli unta dayon ang mga tinun-an sa Mindanao nga wa molapas sa 48 oras.
Apan wa kini mahitabo kay niadto nang Mayo 15, 2020 nanguli sa ilang dapit sa Maguindao ang mga tinun-an.
Niadto ra sang Mayo 13, namiya dinhi sa Dakbayan sa Sugbo ang mga tinun-an alang sa Mindanao.
“After the health requirements were issued, their trip should have been scheduled not exceeding 48 hours,” explained Gealon.
Nagtuo ang investigating team nga nataptap ang mao nga mga tinun-an sa kagaw human na sa Mayo 8.
Gawas sa health requirements, ang mga tinun-an ningtuman usab sa travel pass ug repatriation clearance sa Mayo 8.
Namuyo ang mga tinun-an sa nagkadaiyang mga dapit sa ilang pagpuyo sa Cebu nga naglakip sa Lapu-Lapu City;mga barangay sa Cebu City nga naglakip sa Guadalupe, Sambag 2, Plaridel st. ug Osmena blvd.
Ang mao nga mga tinun-an maoy nipahimus sa Balik Probinsya program.
Dunay 16 ka mga tinun-an,upat kanila negatibo sa polymerase chain reaction (PCR) test sa pag-abot sa Maguindanao sa Mayo 15. (JJL)