ADUNAY 120 ka mga bus nga mobiyahe na gikan sa dakbayan sa Mandaue sugod Hunyo 1, 2020, kanus-a ipaubos sa general community quarantine (GCQ) and dakbayan.
Ang Dakbayan sa Mandaue molugak gikan sa enhanced community quarantine (ECQ) ngadto sa GCQ sa Hunyo 1, 2020.
Nipagawas og Resolution No. 40 ang Inter-Agency Task Force for the Management of Emerging Infectious Diseases (IATF-EID) nga ipailawom na sa GCQ ang dakbayan sa Mandaue.
Sigon ni Mandaue City Mayor Jonas Cortes, ang dakbayan nangandam sa "bag-ong normal" labi na sa mass transit.
Gani nag andam na sila og 12 ka mga rota ug magbutang og 10 ka bus kada rota.
Ang mga rota magikan sa Mandaue paingon sa Liloan, Mandaue hangtod sa Lapu-Lapu ug upat ka rota nga nagtuyok lang sulod sa Mandaue. Adunay rota nga paingon sa SM City Cebu, Ayala Malls Cebu, Cebu I.T. Park ug sa Countrymall.
Apan tungod kay ang Cebu City ipaubos pa man sa modified enhanced community quarantine (MECQ), ang mga bus kutob ra sa boundary.
Gipasabot ni Cortes nga ang labing gamay nga pamasahe sa mga bus P11 sa unang lima ka kilometro. (KFD)